Mizoram in ruahtui dawng tha

Kumin January thla atanga July thla inkar khan Mizoram chuan ruahtui a dawng tha a, District hrang hrang zingah Kolasib chuan ruahtui hi dawng tha berin thla sarih chhung hian ruahtui 1758.6mm a dawng niin Indian Meterological Department, Aizawl chuan an sawi a, ruahtui tlak tlemna ber Lunglei District-ah chuan milimetre 418.4 a tla thung a ni. Kolasib District-ah hian May thla khan ruahtui milimetre 570 tlain ruahtui tlak hnem ber thla a ni a, ruahtui tlak tlemna ber Lunglei District-ah chuan July thla khan ruahtui milimetre 61.6 tlain hei hi an District-a ruahtui tlak tam ber thla a ni ve thung a ni.

Thla 7 chhung hian District dang pawhin ruahtui hi an dawng tha thawkhat a, Aizawl District-ah ruahtui mm 1,508.3 a tla a, Siaha District-ah mm 1,301.4, Champhai District-ah mm 1,084, Lawngtlai District-ah milimetre 859.1, Mamit District-ah mm 941.8, Serchhip District-ah mm 767 a tla a, IMD chhinchhiah danin, Mizo-ram pumah June thla kha ruahtui tlak tam ber thla niin January leh Febraury-ah erawh ruahtui a tla mang lo thung a ni.