Kawnpui leh Sairang inkar kawngpui ah lirthei tlan theihloh khawp harsatna lian a awm tawh lo

Adviser to Chief Minister TBC. Lalvenchhunga chuan tun dinhmunah Kawnpui leh Sairang inkar kawngpui ah lirthei tlan theihloh khawp harsatna lian a awm tawh lo tih a sawi a, kawng chhia avanga bungraw lut khaihlak in mipui tana harsatna a thlen pawh a ziaawm chho mek zel.

Mizoram sawrkar in Kawnpui leh Sairang inkar kawngpui vil tura a ruat Aizawl West-I Bialtu MLA leh Adviser to Chief Minister TBC. Lalvenchhunga chuan Kawnpui leh Sairang inkar kawngpui enkawl chungchang ah sawrkar in a theihtawp a chhuah tih sawiin, tun dinhmun ah chuan kawngpui chu lirthei tan harsatna lian lutuk thleng lova kal theiha siam bak tih theih a awm rih lo a, Plain Cement Concrete (PCC) chin bak kawng khuar nasa zual hnawhna tur hmanrua an lakkhawm hmanga a khuar hnawh bak siam dan vak a awm rih lo tih a sawi a. Kawngpui chu tha taka siam turin a hautak avangin hmalak vak ngaihna a awm rih lo tih pawh sawiin, a khuar zual lai leh lirthei tana zawh hrehawm zual lai hnawha hmanrua te nena duty chu tih theih awmchhun a nih rih thu leh helai kawngah hian 407 Truck chin chunglam tlan tirin, lirthei tang awm ve zeuh thin mah se a hnukchhuak tur khawl dah a nih avangin tun dinhmunah chuan harsatna liantham a awm rih lo tih a sawi a ni.

Kawngpui siam mek vil-a MLA leh Minister ten an tlawh thin chu chhunzawm a nih tawh rih loh thu pawh TBC. Lalvenchhunga chuan sawiin, hei hi hna tak tak thawh theih a nih rih loh avang leh vil pawh nise awmzia a awm loh vang a ni tih a sawi a, kawngpui hi Fur ruahtui hul hunah khawih chhunzawm a ni dawn a, PCC-a siam tur chu KM 2 dang tih belhin hemi atan hian NHIDCL in revise dil mekin a bak chu Patch repair leh Bituminous concretee bawka siam tur a nih thu a sawi bawk.

Hetihlai hian Mizoram chak lakna pui ber Kawnpui leh Sairang inkar kawng chhia vanga lirthei an tlan ngam loh avanga mipui nitin mamawh hrang hranga harsatna thleng chuan ziaawm lam a pan chho ve zel a, hei bakah hian In sakna leh bungraw dang mamawh pawh rawn luh belhin hnathawh khaihlak hrang hrangte pawh a hma anga chhunzawm theih a ni leh tan mek a. Tuialh-thei ah pawh harsatna lian lutuk awm lovin tunhnaia bawnghnute thleng tha lo erawh ala ziaawm lutuk thei rih lo nia thudaw a ni.