Mizoram District pali-ah raltlan te Biometric Enrolment kalpui tan a ni tawh

Mizoram-a raltlan awmte kutzia leh mit-naute lakkhawm hna chu Serchhip, Lunglei, Cham-phai leh Hnahthial District-ah te tan a ni tawh.
Tarlan tawh angin Serchhip District-ah hian tunkar Nilaini atang khan Myanmar leh Bangladesh atanga raltlante Biometric Enrolment hi tan a ni a, SDO (Sadar) Rebecca Laldinmawii Hrahsel sawi danin July ni 30 khan Serchhip Chanmari VC huamchhunga Myanmar raltlan awmte kutzia leh mit-naute thla lakkhawm hna hi tan a ni a. hemi hnu hian chawlhsan rih a nih hnuah karleh Thawhtanni leh Zirtawpni-ah te chhunzawm leh tura ruahman a ni. Serchhip District-ah hian Veng leh khaw 30-ah raltlan hi an awm nia chhinchhiah a ni a. Myanmar raltlan hi mipa puitling 198, hmeichhia 150 leh naupang 299, an vaiin 647 an awm a. Thenzawl khawpui bikah Bangladesh raltlan mipa puitling 75, hmeichhia 73 leh naupang 118 awmin an vaiin 266 an awm a ni. Serchhip District-a raltlan awmte hi Relief Camp-ah awm lovin an chhungkhat laina leh thiante bel deuh vek an ni a, mi In luaha awm an awm bawk.

July ni 30 vek khan Lunglei District-ah pawh Myanmar raltlan 70 chuang awmna Ramthar Camp atangin Biometric Enrolment hi an tan a, thenkhat Aizawl lama sikul kalte erawh chu hun remchanga bawhzui leh tura dah a ni a. Karleh lamah chhunzawm chhoh zel tum a ni. Lunglei District-ah hian Myanmar raltlan mi 1,991 an awm nia chhut a ni. Myanmar raltlan awm tam berna Champhai District-ah chuan tunkar Ningani khan Champhai khaw chhunga VC 3-ah Biometric Enrolment hi tan a ni naa khawl a chiangkuan loh avangin a takin an kalpui thei meuh lova, nimin lamah pawh khawl a that loh avangin chhunzawm theih a ni lo a. Champhai District-ah hian raltlan hi mi 13,586 an awm mek ni a chhinchhiah a ni.

Hnahthial District-ah pawh Hnahthial District Level Committee on Displaced Persons hmalakna in Ningani atang khan Thingsai khuaah Biometric Enrollment of Displaced Persons hi kalpui tan a ni a, a tahtawlin khaw dangah pawh kalpui chhunzawm zel tura ruahmanna siam a ni a. Bawrhsap pisa chhinchhiah danin tun dinhmunah Hnahthial District chhung khaw sawm hnih-ah Relief Camp 13 leh mi In luah Myanmar raltlan mihring 701 an awm mek a. Thingsai-ah hian tam berin mi 230 an awm a, raltlan zingah hian puitling 436 (mipa 198 leh hmeichhia 238) bakah naupang kumtling lo 265 an awm mek a ni.

Tun dinhmunah hian Mizoram-ah hian Myanmar raltlan mi 32,504 an awm mek ni a chhinchhiah a ni a, Champhai District-ah tam berin, Lawngtlai District leh Siaha District te'n an dawt a ni. Kum 2021 February ni 1-a sipai-in Myanmar sawrkar thuneihna an pawng lak hnu thla khat vel atang khan Myanmar atang hian raltlan awm tanin an tam lai ber phei chuan mi sing nga an tling hial a ni.