August thla chhungin sawhthing man ba pek tum

Sawrkar in Sawhthing quintal 3,47,387.40 lei tawhin Sawhthing man ba pawh August 2025 chhunga pekfel tum a ni.

Nimin khan Mizoram State Policy Coordination Committee (MSPCC) huaihawtin Lunglei-a HPC Conference Hall-ah sawrkar Department hotute tan Mizoram Sawrkar Flagship Scheme, Mizoram Bana Kaih (Handholding) Scheme chungchang zirhona leh sawihona neih a ni a, he hun hi MSPCC Vice Chairman Dr. KC. Lalmalsawmzauva chuan hmanpuiin Mizoram Bana Kaih (Hand-holding) Scheme Pilot Phase chu September ni 19, 2024-ah Vanapa Hall, Aizawl-ah tlangzarh a nih thu a sawi a, Pilot Phase (Phase I)-ah Partner Bank pathum - State Bank of India (SBI), Mizoram Rural Bank (MRB) leh Mizoram Cooperative Apex Bank (MCAB) kaltlangin Loan engemaw zat leh CM Special Package engemaw zat pekchhuah a ni chu lawmawm a tih thu a sawi a. Sawrkarin Sawhthing quintal 3,47,387.40 a lei tawh thu leh pawisa senso tur chinfel chhoh mek a nih thu sawiin, cheng vbc. 142 chuang fe a nih dawn thu leh la pung zel tura ngaih a nih thu te, Sawhthing man ba pawh August 2025 chhunga pek fel tum a nih thu te a sawi a. August 2025 chhungin Bana Kaih thawh hnihna (Phase 2) dilna hun hawn leh tuma inbuatsaih mek a nih thu leh Portal tihchangtlun mek a nih thu a sawi bawk.

MSPCC Vice Chairman chuan Bana Kaih-a thil pawimawh zual pahnih chu - thlai thar lei leh sumdawnna bul tan turte Bana kaih (entrepreneurship handholding) a nih thu sawiin, thingtlang lam leh khawpui lam chawikang thei tur ruahmanna a nih thu a sawi a. Thlai thar lei chu thingtlang kut hnathawkte banphak leh leirem an rah theihna tur tinzawna ruahman a nih thu leh khawpuia cheng thalai lehkha thiam, sawrkar hna thawk lo te, sumdawng leh entrepreneur-te tinzawnin awlsam zawka Bank Loan an lak theihna tur ruahman a nih thu a sawi a. Sawrkar chuan Guarantor-a a tansak bakah a pung zawng zawng a rulhpui dawn bawk tih a sawi a. Bana Kaih bank loan chu sekibuhchhuak a nih loh thu leh Chem leh Tuthlawh ngai, tha sen ngai, taima leh ti tak takte tana duan a nih thu a sawi bawk.

He hunah hian MSPCC Member Laldikkimi chuan Bana Kaih Scheme hnuaia hmalakna report pein, kut hnathawktute hnenah thlai thar man dona (support price) pek a nih thu leh Phase I-ah Mizoram pumah CM Special Package dawng tur mi 2,257 leh loan pek tur mi 646 thlanchhuah an nih thu a sawi a. He huna tarlan a nih danin Mizoram Bana Kaih (Hand-holding) Scheme hnuaiah hian Lunglei District chhungah Department 12 kaltlangin Loan dil, Progress Partner atana thlan mi 48 awmin, Department 8 hnuaiah CM Special Package dawng tura thlan mi 362 an awm bawk a ni.