India Independence Day 2025 Serchhip-ah urhsun taka hman a ni
Serchhip Sports Complex-a India Independence Day lawmna ah hian Khuallian Supply Minister B. Lalchhanzova chuan India Hnam Puanzar pawtparhin Parade Chibai buk a chhenglet a, mipuite chu Chibai bukin, “Kum za hnih bawr vel zet Kumpinu nghawngkawl bata, a thuhnuaia India ram a kun hnuah kum 1947 August ni 15 khan zalenna famkim a lo hmu ta a. Kum tina he ni ropui tak kan lawm apiang hian kan ram zalenna sualtute inpekna hre reng ila, an inhlanna zarzoin keini thangtharte hian beiseina kawl eng kan lo hmu ta a ni tih i theihnghilh lo ang u,” a ti.
Mizoram sawrkar hmalakna thenkhat te tarlangin Minister chuan, “Serchhip DC Office chuan August ni 1, 2024 atang khan ‘Digital File Tracking System’ hmang tanin file tinah qr code bel a ni a; file awmna chin awlsam taka chhui theih niin hnathawh a ti sawt hle,” a ti a. Serchhip District chuan Government Online Excellence Award te, Tourism buatsaih District te inelna - Tour Itinerary Creation Competition leh Storytelling Competition-ah te lawmman pakhatna a dawn thu sawiin, UD&PA buatsaih District te inelna Beautification Competition-ah lawmman pathumna a dawng tih a sawi a. Bawrhsap kaihhruai Beautification Committee chuan Serchhip khawpui chei hna uar taka kalpui mekin,”Mizoram-a a hmasa ber leh awmchhun ni turin Serchhip DC Office chuan ‘Vantlang Viltu mobile app’ a siam a. He app hmang hian Serchhip District mipuiten dan bawhchhiatna, vuivaina leh thil pawimawh an thlen duhte hmun leh hmunah an phone hmangin sawrkarah an thlen zung zung thei a ni,” a ti.
Serchhip District Police ten khawtlang ralmuang siam turin theihtawp an chhuah thu Minister chuan sawiin, Zu leh ruihhlo chi hrang hrang an man te a tarlang a, The Mizoram Bana Kaih (Handholding) Scheme hnuaiah Serchhip District chuan Sawhthing lei leh hralh hna tha takin a kalpui thu sawiin, “A thawhkhatna ah quintal 8845, a thawhhnihnaah quintal 55,676 lai loneitute hnen atanga lei sak an ni,” a ti a. Tunhnai lawkah Department hrang hrang kaltlangin CM Special Package mi 200 bawr velin an dawn thu leh tangkai takin hmang se a duh thu te a sawi a ni.
Serchhip District Civil Supplies Office (DCSO) hnuaiah Retailer 89 awmin, chhungkaw 18,093-te ration pek thin an nih thu Minister chuan sawiin, “AAY leh PHH chhungkuate hnenah buhfai a thlawna sem tan niin kumin June thla khan thla 3 quota pek an ni a. Ration chi thar - Mizo-ram State Special Ration Package (MSSRP) chu December 2024 khan hman tan niin buhfai kg-ah Rs. 20 hisapin a lei theih a, Serchhip tan Card 1500 pek an ni,” tiin Ei leh bar tlachham lova Furpui kan paltlang theih nan Monsoon Stock Kudam 6-ah dahkhawl a nih thu a sawi bawk.
Land Revenue & Settlement Department chuan Ram Pass 125 an pekchhuah thu leh Serchhip khawpuiin a mamawh em em Filling Station din belhna tur Land Lease pek a nih bakah Serchhip District Sport Complex ram Land Lease atan sawrkarin recommendation a tihchhuah thu a sawi bawk a. “Land Records Digitization kalpuiin zaah za (20,491 land records) computer-ah thun a ni a. DILRMP (Digital India Land Records Modernization Programme) hlawhtling taka kalpuiin map-a ram thun runpui (GIS map update) pawh ngawrh taka kalpui mek a ni,” tiin Revenue Department hnuaia hmalakna hrang hrang a tarlang a. “Revenue Department hmalaknain nakin lawkah chuan mi tinin kan ram chungchang awlsam takin internet-ah kan hmetchhuak zung zung thei tawh dawn,” tiin Online-a Chhiah pek theih a nih tawh thu a sawi bawk.