Lunglei District-ah Biometric Enrollment kalpui mek

Lunglei District Level Committee on Myanmar & Bangladesh Refugees chu niminpiah khan Addl. DC Zoramdini hovin Lunglei DC Conference Hall-ah an thukhawm a, he hunah hian Lunglei District-a Myanmar leh Bangladesh atanga raltlante khawl hmanga an nihna finfiah theihna tura chhinchhiahna, 'Biometric Enrollment' kalpui mek chungchang an sawiho a ni. Refugee Biometric Enrollment hi Lunglei District-ah July ni 30, 2025 khan kalpui tan niin Lunglei Ramthar Refugee Camp-ah bultan a ni a. Ramthar Camp-a zawhfel a nih hnuah Thaizawl Camp-ah kalpui leh mek niin hmalak dan tur hrang hrang an sawiho nghal a ni.

Lunglei DC Office-in an chhinchhiah danin, tun dinhmun (August 2025)-ah Lunglei District chhungah raltlan awmkhawmna Camp pakua (9) - Haulawng (Saichhoh), Hauruang, Khawmawi, Mualthuam North, Phairuangkai, Pukpui, Ramthar, Thaizawl leh Vanhne-ah te awmin, heng ah hian Myanmar atanga raltlan 1,175 an awm mek a. Camp pawn lam, khawchhunga In luah leh mi In-a mikhual mi 816 awm bawkin, an zavaiin raltlan 1,991 awm mek anga chhinchhiah a ni a. Mipa puitling 545, hmeichhe puitling 660 leh naupang (kum 18 hnuai lam) 786 an ni. Lunglei District chhungah hian Bangladesh atanga raltlan mi 63 an awm mek bawk a, heng mite hi Khawmawi khua ah vek an awm a. Mipa puitling 18, hmeichhe puitling 17 leh naupang 28 an ni.