Mizoram-a 'Biometric enrollment' kalpui mekah raltlan mi 887 chhinchhiah an ni tawh

Mizoram-a raltlante 'Biometric enrollment' tih mekah July ni 28 atanga nimin chawhma thleng khan mi 887 chhinchhiah an ni tawh a, Serchhip District-ah pawh khaw pathum-ah 'Biometric enrollment' hi kalpui ni tawhin mi 67 chhinchhiah an ni tawh a ni.

Ministry of Home Affairs-in Mizoram chhunga raltlante chhinchhiahna 'Biometric enrollment' nei tura a tih angin Mizoram District 11-ah Myanmar leh Bangladesh atanga raltlante chhinchhiahna hna hi thawh a ni a, Home Department hotute sawi danin, raltlan lo lutte chu an kutzia chhinchhiah an nih bakah, an ram-a an chenna hmun leh an hnathawh mekte biometric enrollment hmangin chhinchhiah an ni. 

Tunah hian Myanmar atanga raltlan lo lutte chhinchhiahna neih mek niin Myanmar raltlante chhinchhiahna neih zawh ah Bangladesh atanga raltlante chhinchhiahna kalpui leh a ni ang. Raltlan chhinchhiahna hi Aizawl-ah July ni 28 atang khan neih tan niin mi 74 chhinchhiah tawh an ni a, Lunglei-ah mi 103, Siaha-ah mi 106, Champhai-ah mi7, Kolasib-ah mi 15, Serchhip-ah mi 67, Mamit-ah mi 33, Lawngtlai-ah mi 261, Hnahthial-ah mi 53, Khawlzawl-ah mi 80 leh Saitual District-ah mi 88 chhinchhiah an ni tawh a ni.

Serchhip DC Office atanga LENKAWL in thu a dawn danin Myanmar raltlan te chhin-chhiahna tura Biometric Enrolment hi July 30 khan Serchhip District-a a hmasa ber turin Serchhip Chanmari VC Area-ah tan a ni a, hetah hian mi 16 te chhinchhiah niin August 4, 2025 khan khaw pahnih-ah neih leh a ni a, Serchhip Darnam VC area-ah raltlan mi 41 vel an awm nia hriat an nih laiin mi 45 te Biometric Enrolment tih sak an ni a, eizawnna leh zirna avanga hmundang-a awm mi 10 te erawh an Data lak theih ala ni lo thung a, Hemi ni vek hian Khawlailung-ah Team dang ten Biomentric Enrolment hi kalpuiin raltlan mi 7 awm zinga mi 6 te chu an Data laksak an ni bawk.

Ruahman lawk ang chuan naktuk, Aug. 8 khian Serchhip Dinthar VC area-ah raltlan te Biometric data lakkhawm hna hi thawh leh a ni ang.