LADC-ah CEM thar fiahna neih theih rih loh

Lai Autonomous District Council (LADC)-a sawrkar thar lakluh a nih hnuah nimin khan Chairman leh Deputy Chairman ten banna an thehluh ve leh avangin LADC sawrkar fiahna nimin a neih tum chu tih hlawhtlin theih a ni lo.

LADC-ah hian niminpiah khan MNF, BJP leh Congress ten an thlawp United Democratic Alliance (UDA) hruaitu N. Zangura chu Chief Executive Member (CEM) atan lakluh niin LADC Chairman T. Zakunga chuan CEM thar hian thlawptu a ngah tawk em tih fiahna nei turin nimin chhun dar 12:00-a thutkhawm nei turin a ko nghal a. Nimin-a thutkhawm neih tan a nih hma hian LADC-a Chairman T. Zakunga leh Deputy Chairman C. Biakthansangi te chuan banna an thehluh ve leh avangin LADC-a CEM thar fiahna hi neih theih a ni ta lo a. LADC Chairman atanga bang ta T. Zakunga hi kumin March 26 khan LADC Chairman atan thlan niin April 22 khan C. Biakthansangi hi Deputy Chairman atan thlan a ni ve bawk a ni.

Hetianga LADC-a Chairman leh Deputy Chairman an ban tak avang hian UDA lam chuan Governor hnenah Protem Chairman ruat sak tura thlenin MDC Lalthanmawia Colney chu Protem Chairman atan nimin tlai khan ruat nghal a ni a, Vawiin hian Protem Chairman hi lakluh tura ruahman niin tunkar Zirtawpni, August 22 khian LADC Chairman thar tur thlanna neih zui nghal a ni ang.