DC leh SP ten inbiakna nei

Tunhnaia Mamit District Saikhawthlir khaw bula Rubber kung phun Assam Police leh Forest Department-te'n an tihchhiat chungchangah Mamit leh Hailakandi District-a DC leh SP te chuan inbiakna an nei.

He inbiakna Bairabi Civil Sub-Divisional Conference Hall-a neih ah hian Mamit Bawrhsap K. Laltlawmlova chuan Mamit District chu Reserved Forest Area huamchhunga a awm thu leh Mamit District chhunga mipuite chuan Reserved Forest Area hmang tangkai turin dikna chanvo tam tak an neih thu a sawi a. Tunhnaia Assam Police leh Forest Department te'n Saikhawthlir khaw bula Rubber kung phun te an tichhiatna hmun chu Kawrthar Forest Division hnuaia awm a nih angin GIS Cell, EF&CC Department Mizoram in Map a siam chhungah a tel thu a tarlang bawk.

Hailakandi District Deputy Commissioner Abhishek Jain IAS chuan tunhnaia Sai-khawthlir khaw bula Rubber chingtute'n buaina a tawhna hmun chu State Ramri chungchanga buaina a nih loh thu leh Reserve Forest Area-a Plantation kalpui a nih avanga zawka inhriatthiam lohna thleng a nih thu a sawi a. Helai hmun hi Inner Line Reserve Forest, Gharmura Range, Hailakandi District huamchhung a nih thu leh Reserved Forest Act 1980 hnuaia humhalh niin he Act-a Section 2A chuan Rubber kung leh thildang phun a khap tlat thu te sawiin Assam Police leh Forest Department-te'n tunhnaiah helai hmuna Rubber kung phunte an tihchhiat chhan a sawifiah a. Assam State chhungah Kilometre 1.5 vel a thui Rubber kung inphun hi Forest Conversation Act 1980 kalh a nih theih dante leh National Green Tribunal (NGT) ngaihmawh tak a tlin theih thu te a sawi bawk a ni.

He thutkhawmnaah hian buaina chinfel dan tur leh hun lo kal leh zelah pawh buaina dang a thlen nawn tawh loh nan ruahmanna fel zawk siam dan tur ngaihtuah nise an ti a ni.