Kolasib-ah Online-a Chhiah pekna tlangzarh

Land Revenue & Settlement Department hnuaia Chhiah chi hrang hrang Online a pek theihna tur tlangzarhna hun nimin khan Kolasib-ah hman a ni.

Sawrkar hnuaia chhiahte awlsam taka pekna tur, Online Tax Payment System hi Kolasib Settlement Officer (SO) H. Lalramliana chuan tlangzarhin Sawrkar chuan dan lova chêtna lakah mipuite himna a ngaih pawimawh thu leh an hnathawhna kawnga harsatna sukiang turin Online Tax Payment System, Land Revenue & Settlement hnuaia siam a ni ta chu lawmawm a tih thu leh hmasawnna ropui tak a nih thu a sawi a. Online Tax Payment System hi mipuite tana a awlsam zawkna tura siam a nih thu leh Chhiah pe tura Office hmunah kal kher ngai lovin, mahni In atanga him tak leh felfai taka chhiah pek theihna, Receipt-te pawh chiang taka in chhinchhiah nghalna a nih thu a sawi bawk a. Online Tax Payment chungchang ah hriatthiam loh leh zawhfiah duh nei chuan Land Revenue Settlement Department Office-ah zawhfiah reng theih thu tarlan a ni bawk.

Kolasib Land Revenue & Settlement Office hian August 2024 leh August 2025 chhungin Leiman (chhiah) khawnna, Pass khulchhuahna leh Tax dangte atangin cheng nuai 193 chuang Sawrkarah a lo chhunglut tawh a, Pass 375 ziaklutin, Pass 319 chu Renew a ni a, Ram 511 tehfel a ni tawh bawk.