Women Helpline-in hmeichhiate chunga hleilenna report kumin-ah 7481 zet an dawng tawh

Mizoram sawrkar Women and Child Development hnuaia Women Helpline-te chuan kumin April ni 1 atanga thla hmasa July thla tawp thleng khan hmeichhiate chunga hleilenna thleng report 7481 an dawng tawh a. Hmeichhia te chunga hleilenna tuartu zingah hian kum 18 leh 40 inkar an tam ber nia chhinchhiah a ni.

Women and Child Development hnuaia Women Helpline Office hotute chuan hmun hrang hrang atangin hmeichhia te chunga hleilenna report an dawn thin thu sawiin, July 2016-ah Mizoram-ah hna an thawk tan a, hemi kum hian Call tum 812 dawngin kum 2017-2018 ah tum 1320 an dawng leh bawk a, Call an dawn hi pung chho hret hretin kum bithliah-a an then hran danah sawrkar kum limta, nikum (2024) April ni 1 atanga kumin March ni 30 chu report an dawn tam ber tum niin report 13,994 zet an dawng tih an sawi a. Sawrkar kum kal mekah kumin (2025) April ni 1 atanga thla hmasa July thla tawp thlenga hmeichhiate chunga hleilenna thleng report 7481 an dawn tawh thu an sawi bawk a ni.

Women Helpline Office chhinchhiah danin hmeichhiate chunga hleilenna hi kum 18 atanga kum 40 ten an tawk nasa ber a, hleilenna tuar nia insawi zinga za zel-a 71 chu hmeichhia kum 18 atanga kum 40 inkar te niin za zel-a 18 vel chu kum 41 atanga kum 60 inkar an ni bawk a. Hmeichhe kum 60 chunglam zingah pawh hleilenna tawk an awm thu hi sawiin, hei hi report an dawn zawng zawng atanga chhutin za zel-a 2.5 anih thu an sawi a, kum 17 la tling lo te chunga hleilenna thleng chu za zel-a 4.5 a tling niin an sawi bawk.

Women Helpline hotute sawi danin hmei-chhiate chunga hlei lenna hi chi hnih- Domestic leh Non-Domestic-ah then a ni a, Domestic Violence/Abuse-ah hian kut thlak bakah hmeichhiate chunga diriamna tawngkam uchuak leh vauna tawngka hman te, sum-a inbumna bakah mipat hmeichhiat lam hawi leh ruihtheih thil zu leh damdawi hmanga hmeichhe duh lo chung hrairuih te a huam a ni.

Non-Domestic Violence hian Social Media hmanga hmeichhe tih mualpho bakah hurherhna lam hawi zawnga hmeichhe chhaih te, hmeichhiate remtihna tel lova anmahni dikna chanvo rapbet khawpa an chanchin leh nun hman dan chhui zuite bakah thudik zik tluak lo, nun tichhe thei khawp a hmeichhiate beih te a huam a ni.