Khualzin hipna atana thawnthu insawisiak ah Serchhip District in lawmman pakhatna a dawng

Khualzin te hipna atana District hrang hrang ten an District chhunga hmuhma chanchin sawia an inelna, ‘Narrating Mizoram: A Tales of Our Land – Storytelling Competition’ neih zawh takah Serchhip District chuan lawmman pakhatna a la.
Tourism Department bultuma Mizoram District hrang hranga June thla atanga kalpui tawh, Thawnthu sawi hmanga inelna ‘Narrating Mizoram: A Tales of Our Land – Storytelling Competition’ hi Zirtawpni zan khan Aizawl-a Ignite Studio-ah a hmawr bawkna neih a ni a. Hemi hmalam hian District hrang hrang ten an huamchhung ah khualzin te hipna tura hmunhma leh hmun pawimawh an neih te chanchin sawi-a inelna neiin heta titha te hian a hmawrbawkna ah hian intihsiakna an nei a, he hunah hian District 10 ten an aiawh tirin Serchhip District atang hian Govt. Serchhip College-a zirlai Lalruattluanga leh Lalthanzami Chhangte te an tel a, anni hian Chuanthar Tlangnuam, Sialhau, Serchhip (Para-Gliding Take-Off Point), Serchhip Zawlpui, Thenzawl leh a chhehvel bakah North Vanlaiphai leh a chhehvel chanchin an sawi a, a pumpui-ah pakhatna niin lawmman ah thuziak leh pawisa fai Rs. 50 000/- an dawng a, Saitual District chu pahnihna niin Rs. 30,000/- an dawn bakah pathumna Khawzawl District-in Rs. 20,000/- an dawng bawk a ni.

Zirtawpni zan-a he intihsiakna hun hi Tourism Department Minister Lalnghinglova Hmar chuan telpuiin Tourism Department in zin mite hip nan leh kan ram hmun pawimawh leh nuam tak takte chanchin vawnnun nan Mizoram District hrang hranga hmun pawimawh behchhana thawnthu sawi hmanga inelna buatsaih a ni chu lawmawm a tih thu a sawi a. Kan ram, kan hnam leh kan hmunhma chanchinte ngaihnawn taka midang hnen a kan sawi thiam chuan a ngaithlatute thinlungah a taka hmuh ve chakna a tuh a, chu chu kan rama Tourism tih hmasawnna kawngah thil pawimawh tak a nih thu a sawi a. Mizoram hmun hrang hrang thawnthu sawia inelna buatsaihna hian zin mite hipna kawng ah hmasawnna a thlen ngei a beisei thu a sawi bawk.

He hunah hian Tourism Department Director R.Lalrodingi zin mite leh a chhunga chengte vekin kan State chhunga hmun nuam tak tak an hmelhriat nan leh tlawhchhuah a nih theih nana, phochhuah tlakte phhochhuak tura District Level atanga inelna hi buatsaih a nih thu a sawi a. He hmalakna hlawhtlin nachhan pawimawh ber chu he inelna a tel te vang a nih thu sawiin. Participants chungah leh Deputy Commissioner zawng zawng chungah lawmthu a sawi a. Tourism tihmasawn tur chuan kan ram leilung hausakna, a hmelhmang danglam bikte leh zimmite tana service kan pek theih hrang hrangte phochhuah tam chu a pawimawh thu a sawi bawk.