NGHAM te inhnukhniam thei

Mizoram-a Private Damdawi In neitute pawl, Non-Government Hospital Association (NGHAM) chuan Mizoram Universal Health Care System (MUHCS) hmang turin NGHAM a inhnukhniam thei tih sawiin, Mizoram sawrkar pawhin ngaihtuahna a hman that leh ngei an beisei tih an sawi.
NGHAM hian hmundanga an lo tih tawh thin angin Inrinni khan New Serchhip-a Mercy Hospital-ah a thlawna inentirna hun an buatsaih a, he hunah hian ZPM Serchhip Block hruaitute nen inkawmin NGHAM hruaitute chuan MUHCS an zawm loh chhan an sawifiah a, NGHAM President Dr. Lalrintluanga Jahau leh a thawhpuite chuan MUHCS chu mipui tana tha, mahse Private Hospital tlakchhiat hlenna tur nia sawiin, Mizoram-a Damdawi In awmsa ah paw h damlo an len mang loh laiin mipui tana chhawr hleih theih lohva Private Hospital te an awm chu pawi an tih thu leh tha tak leh lungrual taka mipui tana tangkai thei ang bera thawh tlân ni thei se, chuta atan sawrkar an ngaichang reng tih an sawi a ni.

NGHAM hruaitute chuan, sawrkar chu an do lo mai ni lovin thawhpui an chak reng tih pawh sawiin, MUCHS hman theihna turin natna enna khawl hman man leh damlo enkawlna man sang zawk Max Hospital Delhi a mi pawh Mizoram sawrkarin a pawm thei tho a, he Damdawi In a Mizoram tana 10% discount an pek pawh, Mizoram tan chauh ni lovin North East State tin te tan a ni a. Chuvangin Mizoram sawrkar chuan Mizoram a damlo enkawlna a pek theih zat pe in, a bak chu damlo tena an pek turin ruahman leh mai se an ti a. Hetihlai hian Sawrkar tan pek tur zat pek nghal mai a harsat pawhin damlo ten an pek fel hnua rulh leh tur pawhin ruahman leh mai theih a nih thu an sawi a. Hetianga sawrkar nen an inrem chuan Mizoram mipuiin Damdawi In-a inenkawlna kawnga harsatna an tawh mek chu a ziaawm deuh ngei tur thu an sawi a ni.

He hunah hian damlo mi 500 vel inentirin Aizawl atangin Doctor thiam te an rawn kal a ni.