Saikhawthlir-a Rubber chinna rawn tihchhiat sak

Inrinni chawhnu dar 2:10 khan Mamit District Zawlnuam RD Block chhunga Saikhawthlir ram chhung Diltlang Lui zau-ah Assam Official-te'n Rubber huan an rawn suasam.

Saikhawthlir VCP Lalthuthlungmawia'n Akashvani Aizawl a hrilh danin an khaw mi pahnih te Rubber chinna huan rawn kalchilhtu Assam Police mi 8 leh Forest mi 2-te chuan an Rubber phun sa leh la phun loh thlengin an tihchhiatsak vek a. An suasam sakte hi Zoliana Rubber kung phun tawh 240 leh la phun lohte bakah Loba Rubber kung 50 te a ni a, an kir leh hnu-ah Rubber huan neitute hian a bul hnaia Border Police Outpost chu hriattir mah se, an insaseng hman tawh a ni. Helai hmuna Rubber chinte hi Chief Minister Rubber Mission hnuaia kalpui a ni a. Rubber phun a hnathawk a awm hmanrua te chu Assam Official-te hian chhuhsak bawk a ni. 

Nimin zing khan Saikhawthlir khawtlang hruaituten helai bul hnai a Police Border Outpost tlawhin thil thlen dan an hriattir a, tun hnua a thlen leh tawh loh nana venhimna lam kalpui dan tur chungchangte an sawiho a ni.

Lalthuthlungmawia chuan Assam Police leh Assam Forest te hi kumin ah Rubber chinna hmuna an rawn kal vawi hnihna a nih thu a sawi a. Tun thla ni 5 khan helai hmunah hian lokalin Rubber chinna hmunte hi an rawn thlithlai a, hemi tum hi chuan huan neitute pawh hawihhawm ang reng taka biain thla te an la a, an kir leh mai niin a sawi a. Kum kalta lam pawh khan an rawn tibuai tawh thin niin a sawi bawk.