Independence Day pualin ‘Tiranga Yatra’ neih a ni
Nimin-a kawngzawh ‘Tiranga Yatra’ hi hmun hnih (2) atanga tanin chawhnu dar 2:00-ah Serchhip College peng leh Serchhip P&E Veng-a Mini Park atanga neih a ni a, he hunah hian School naupang te, College zirlaite leh mi nawlpui thenkhat te telin Serchhip IOC Veng-a Bawrhsap Pisapui tual-ah intawkkhawmin a kharna hun hman nghal a ni a. He hunah hian Serchhip Bawrhsap Paul L. Khuma chuan he kawngzawh hi India-in British Sawrkar atanga zalenna a hmuhna ni champha lawmna peng pawimawh tak pakhat a nih thu a sawi a. India ram hmun hrang hranga cheng, hnam hrang leh tawng hrang hmangtute hian in unauna leh inpumkhatna thinlung thar puin, kan thinlungah theuh hei hi vawng bung thar leh turin he huna kalkhawmte chu a chah a ni.
He hunah hian Serchhip SP Gavit Gogna pawhin he kawngzawh ten an ken India Flag hlutna leh a pawimawhna te, zah taka ken tur a nih zia leh kan hnam inpumkhatna tilangtu a nih thu a sawi a ni.
Nimin vek khan Serchhip DC Pisapui Hall kawt-ah leh I&PR Conference Hall-ah te India Independence Day vawi 79-na pualin ‘Photo Exhibition’ neih chhunzawm nghal a ni a. Hemi hmalam August ni 7 leh ni 8-ah te Exhibition hi neih a lo ni tawh bawk a ni.