Ruihhlo hi kan ban phak lekah awm mah se kan ti ve tur a ni lo - Chief Minister

Chief Minister Lalduhoma chuan, “Ruihhlo hian eng thil tha mah min pek loh avangin kan ban phak lekah awm mah se kan ti ve tur a ni lo,” a ti.

Nasha Mukt Bharat Abhiyan (Drugs Free India Campaign) Mizoram State Level leh Aizawl District Level bultumin nimin zing khan Aizawl khawpui chhunga School leh College hrang hranga zirlai mi 600 chuang te chuan Aizawl-ah kawngzawh, Rally- Fight Against Drugs an nei a, he kawngzawh hi Chanmari leh Sikulpuikawn atanga tanin Aizawl Lammual-ah lut khawmin Rally kharna buatsaih zui a ni. Chief Minister hian Chanmari atanga kawngzawhte hi vailiamin an zingah tel zuiin Lammual thlengin kawng a zawh a, a kharna hunah hian thu a sawi nghal bawk a ni. He hunah hian Chief Minister chuan Mizoram hi ruihhlo siamna hmunpui ‘Golden Triangle’ an tih mai depa awm kan nih thu sawiin, “A kal kawnga awm kan nih vangin ruihhlo hi hmuh tur a tam thin. Nimahsela, ruihhlo hian eng thil tha mah min pek loh avangin kan ban phak lekah awm mah se kan ti ve tur a ni lo,” a ti a. A ruka zuarte pawh khawtlang hian hnawl ngam a tul thu sawiin, “An phu tawk hremna hmu ngei rawh se,” a ti a. “Mipuite tang tlang ila, he thil tha lo tak lakah hian kan hnam hi veng him ang u. Kan thalaiten eng ruihhlo mah hi lo tichhin suh u. Tihchhin hi a bawih-a luhna kawngka a ni,” tiin Ruihhlo bawih a tang mekte pawh huaisen taka kalsan ngam turin a fuih bawk.

He kawngzawh-a tel te hian ruihhlo that loh zia inzirtirna thuziak hrang hrang kengin an au rual bawk a. He huna Placard siamtute tan inelna buatsaih niin lawmman dawngtute hnenah lawmman hlan nghal a. Miss Grand India Vanlalnuntluangi kaihhruaiin kalkhawmten thutiam (Pledge) an chhamrual bakah Health Minister Lalrinpuii leh Excise & Narcotics Minister Lalnghinglova Hmar te pawhin thusawina hun an hmang bawk a ni.

Ministry of Social Justice & Empowerment, Govt. of India chuan Nasha Mukt Bharat Abhiyaan (Ruihhlo Tello India Campaign) hmang hian India ram pumpuiah Ruihhlo Do beihpui a thlak mek a, he hmalakna hi India ram chhung District 372-ah kalpui mek niin Mizoram-ah chuan District zawng zawngah kalpui a ni a. He Campaign hian ruihhlo that lohzia zirtir leh a la ti ve lo te venhim chu a tum ber a ni. Nasha Mukt Bharat Abhiyaan kum 5-na (5 years) denchhenin Central Ministry chuan India ram pumah nasa taka campaign hi kalpui turin ruahmanna a siam a, hemi ang hian Aizawl-ah chuan he Rally hi buatsaih a ni a. Hei bakah hian Sawrkar pisa hrang hrangah leh District hrang hrangah he ni pual-a thutiam lakna hun hi hman a ni bawk.