Home Minister in MPL leh MEC hmunhma te a tlawh

Home Minister K. Sapdanga chuan Inrinni khan Lunglei Theiriat-a Mizoram Polytechnic Lunglei (MPL) hmunhma leh Pukpui-a Mizoram Engineering College (MEC) tur hmunhma te chu tlawhin an dinhmun a enfiah.

Home Minister K. Sapdanga chuan MPL chu Engineering lama mi thiam tak tak leh Mizoram innghahnathahnem tak chherchhuaktu, Mizorama Technical Institution upa ber leh pûm pawimawh tak a nih angin a hlu hle tih a sawi a, tluang tak leh tha taka zirna kalpui a nih theih nan sawrkarin theihtawp a chhuah tih sawiin, harsatna leh mamawh la awm - Building thuamthat leh thawktu indaih lohna phuhrukna tur te pawh a tul anga ngaihtuah chhoh zel a nih tur thu a sawi a. 

MPL Principal Er. Lalnuntluanga chuan ram luah man chungchanga Court thubuai vanga June ni 27-a MPL building engemaw zat kalh chu sawrkar hmalaknain August ni 12-ah hawn a nih leh tawh thu leh Class pawh pangngai taka kalpui a nih tawh thu sawiin, sawrkarin a ngaih-sakna ah an lawm tak zet tih a sawi.

Home Minister K. Sapdanga hian Pukpui-a Mizoram Engineering College tura sak chu a dinhmun enfiah bawkin MEC chu Engineering zirna tur leh Mizoram hmasawnna atana zirna In pawimawh tur a nih avangin Chief Minister-in a duh ang ngeia kum 2026-2027 Session-a tan hman a nih theih nan tha tak leh chak taka hna thawk turin Department hotute leh thawmthat ngai leh buaipui ngai hrang hranga mawhphurtute chu a chah a. Mamawh an neihte pawh sawrkara thlen zung zung turin a chah bawk.

Mizoram Engineering College-ah hian building ding lai 8 - Academic Block, Administrative Block, Workshop/Laboratory, Library, Boys Hostel, Girls Hostel, Cafeteria leh Students Common Room te a awm a, tunah hian thawktu lak hna pawh kalpui mek a ni tawh a ni.