‘Hnam Tobul Chhuichhuaktu’ tur din a ni

Chief Minister Lalduhoma'n Mizoram-ah kalphung thar hnuaiah Mizote chu eng hnam nge, tu thlahte nge tih Official-a pawm tlak a awm theih nan ‘Hnam Tobul Chhuichhuaktu’ tur din a nih thu a sawi.

India ram zalenna ni vawi 79-na lawmna Zirtawpni kalta-a Aizawl Lammual-a neih ah Chief Minister Lalduhoma chuan ‘Kalphung Thar Mipui Sawrkar’ tih thupui hmangin ‘Kalphung thar’ policy hnuaia hmalakna thar an neih te a sawi a. Eiruk leh hlemhletna chu sawrkar hmalakna tithuanawptu ber a nih avangin ngaih pawimawh hmasa-ah an nei nghal a. Corruption do dan thar an duan zingah CBI hnena General Consent pek te, mipuite’n sawrkara an thil thlen te tihkhawtlai a nih loh nan Right to Public Services Act 2025 tlawhchhana subject tihpun te, Project tihkhawtlai te, hnathawh chhiate a awm tawh loh nan a endiktu tur Project Monitoring Committee din a nih thu te a sawi a. Lok Ayokta tihchangtlun a nih thu te, Retailer-ten buhfai an sem bang hralh awih a nih tak loh avanga kum khat chhunga buhfai quintal sing tel an hum theih tak thute a sawi bawk. 

Finna leh thiamna lo chhuak thar zel te chu ban phak tumin Technology thar hmangin mipuite tana a awlsam zawk nan Aizawl Civil Hospital-ah OPD Card Online-a lak theihna tur e-OPD te, gpay hmanga Electric Bill pek theihte, ILP Online, Online Birth & Death Registration, Mipui Aw Portal leh a dangte kalpui an ni tawh tih a sawi a. Artificial Intelligence pawh sawrkar chuan a tul anga hman tangkai ve zel tumin hma a lak mek tih a sawi bawk.

Kawng chungchang pawh sawiin Chief Minister chuan, kawngte a lo tlo zawk nan Paver khawl luh theihna chinah B.C system hman tan a ni a, kumtluan-a hna thawh a nih theih nan kawngpui pawimawh chin te chu Rigid Pavement hmanga thawh phalna Central-ah dil mek a ni, a ti a. Kawng siamna tikhawtlai thintu ber Forest Clearance chu State sawrkarin a pek ve theihna turin kawng pawimawh zawng zawng te chu National Strategic Importance-a puansak turin Prime Minister leh Defence Minister dil mek a nih thu a sawi a. NHIDCL Managing Director nen Delhi-a an inhmuh tumin Vairengte leh Sairang inkar Short Term Maintenance Contract hna atan cheng vbc. 59.05 an sanction fel tawh thute, tunhma a kawngpuiin a paltlang, tuna a tlawh tak loh hmun 5 te chu kalkawng hlui maintain leh vek tura an ruahman thu te, NH-302, Lunglei leh Tlabung inkar kawngpui chu NHIDCL kuta hlanin, Bangladesh ram thleng kawngpui thlur hnih a an siam tur thu a sawi bawk a. Kalphung thar hnuaia hma an lakna hrang hrang - Aikal tihtawp thu te, Sawrkar hna ah qualify chauh lak a nih tawh tur thu te, Mizote chu eng hnam nge kan niha, tu thlahte nge kan nih official-a pawm tlak a kan neih theih nan ‘Hnam Tobul Chhuichhuaktu’ tur din a nih thu a sawi bawk a ni.