District hrang hrangah Biometric Enrolment tan a ni

Myanmar leh Bangladesh atanga raltlante kutzia leh mit-naute lakkhawm hna chu District zawng zawngah July thla tawp lam khan tan a ni.

Hriat theih chinah Myanmar leh Bangladesh atanga raltlante kutzia leh mit-naute thlalak lakkhawm hna (Biometric Enrolment) hi Serchhip, Lunglei, Champhai, Saitual, Khawzawl, Aizawl, Lawngtlai, Mamit, Siaha, Kolasib leh Hnahthial District-ah te July thla chawhnu lam khan tan a ni tawh a. District tinin Biometric Enrolment hi July thla chawhnu lam khan an tan vek a, July ni 28 leh ni 29-a tan te an awm laiin a tam ber erawh chuan July ni 30 leh 31-ah emaw khan an tan a ni. Myanmar raltlan awm tam berna, raltlan 13,586 awm nia chhinchhiah Champhai District-ah chuan July ni 30 khan tan mah se an khawl hmante a chian theih loh avangin an la chhinchhiah tam lo a. Tunkar chhovah hi chuan an kal tluan tawh an beisei a ni.

Raltlan ngah ber dawttu Lawngtlai District-ah pawh July ni 30 atang khan Chanmari Kanaan Relief Camp atangin Biometric Enrolment hi an tan a. Tun thlengin mi 152-te mit-naute leh kuze thla an la tawh a. Lawngtlai-ah hian Myanmar raltlan bakah Bangladesh raltlan 2,000 chuang an awm mek a, an Biometric data hi lak vek tura ruahman a ni a. Bangladesh raltlan hi Serchhip District-a Thenzawl-ah 266 an awm bawk. Myanmar raltlan mikhual tam ber pathumna Siaha District pawhin July ni 31 khan Biometric Enrolment hi an tan tawh a ni.

Tun dinhmunah Mizoram-ah Myanmar raltlan hi 32,504 an awm mek nia chhinchhiah a ni a. Champhai District-ah tam berin, Lawngtlai District leh Siaha District ten an dawt a ni.