MUHCS-ah hlawh cut cheng vbc. 5.85 tlingin cheng vbc. 30 chuang pekchhuah a ni tawh

Kumin April thla atanga June thla tawp thlenga sawrkar hnathawk ten an hlawh atanga Mizoram Universal Health Care Scheme (MUHCS) atana sum an thawhkhawm chu Rs. 5,85,34,075/- a tling a, July thla tawp thleng khan MUHCS hnuaiah damlo inekawlna senso Rs. 30,08,79,224 pek a ni tawh bawk.

RTI Dan hmanga zawhna Finance Department in an chhanna atanga a lan danin kumin April thla atanga Mizoram sawrkar in MUHCS a kalpui tanah sawrkar hnathawk nghet bakah Provisional Employee, Muster Roll leh Contract Employee te chu an dinhmun a zirin an hlawh atanga sum cut sak thin an ni a, hemi atana Integrated Financial Management and Information System (IFMIS) Data hmang sawrkar hnathawk hlawh cut chu April thla ah sawrkar hnathawk mi 35,220 atangin Rs. 1,94,87,000; May thla ah mi 35,264 te hlawh atangin Rs. 1,94,86,400 leh June thla ah sawrkar hnathawk mi 35,164 te hlawh atangin Rs. 1,95,60,675 a ni a, thla thum (3) chhunga sawrkar hnathawk te hlawh atanga sum cut zawng zawng hi Rs. 5,85,34,075/-a tling a ni. Sawrkar hnathawk hi lut thar leh Pension-a chhuak an awm reng avangin thlatin-a sum cut hi a danglam ve a, Pensioner te sum thawh chu IFMIS in huam ve lovin April thla atanga June thla thlenga Pensioner te zinga MUHCS zawm tawh an hriat theih chin chu 10,070 an ni.

Hetihlai hian Finance Department chuan MUHCS atan Mizoram State Health Care Society hnenah Cheque leh Bill hmangin sum hi an pechhuak ve reng bawk a, Zirtawpni khan sawrkar Damdawi In 61-a damlo inenkawlna senso cheng vbc. 1.90 a pechhuak leh a, hemi nen hian MUHCS hnuaia mi 23,419 te inenkawlna senso Rs. 30,08,79,224/- pekchhuah tawh niin mi pakhat enkawlna atan Rs. 12,000/- vel zel sawrkar in a seng ang a ni a, hei hi kumdanga Health Care Scheme-a mi pakhat inenkawlna senso atana sum sen aiin a tlem zawk niin MHCS-a thawktute chuan an sawi a. Mizoram Health Care Society thawktute sawi danin MUHCS hnuai sum pekte hi AB PMJAY hnuaiah Rs. 15,32,14,404; sawrkar hnathawk (Govt. employee) te inenkawlna senso Rs. 4,26,72,679; MUHCS-a inziaklut (contributory) te inenkawlna Rs. 7,17,36,708 leh Pensioners te inenkawlna senso Rs. 3,32,46,423 te an ni a. Damlo enkawlna sum pekchhuah tawh hi a vaiin Rs. 30,08,79,224 a tling tawh a ni.

Zawhna chhangin Mizoram Health Care Society-a thawktute chuan damlo bill pekchhuah kawngah harsatna an tawk lo tih an sawin a, bill hi kartin an pechhuak tih sawiin, riat theih chinah Mizoram pawna damlo refer mi 346 te inekawlna senso pek a ni tawh tih an sawi bawk.

Mizoram Universal Health Care Scheme (MUHCS) hnuaia inzialuhna hun hmasa, April atang June thla tawp thleng khan chhungkaw 18,294 inziaklut awmin tunah hian a thawh hnihna atan inziahluhna hun hi hawn leh mek a ni a, thudawn danin MUHCS a inziahluhna hun hmasa ah khan Aizawl District-ah inziaklut tam berin chhung-kaw 10,100 an inziaklut a, Siaha District-ah chhung-kaw 2153, Lunglei District-ah chhungkaw 1471, Lawngtlai District-ah chhungkaw 1028, Cham-phai District-ah 992, Kolasib District-ah chhungkaw 841 leh Serchhip District-ah chhungkaw 739 an inziaklut a, heng bakah hian Online hmanga inziaklut chhungkaw 590 an awm bawk a ni.

MUHCS-a inziaklut zingah hian a man hniam ber, Rs. 2500-a inziaklut tam berin chhung-kaw 16,103 an awm a, Rs. 5000 chawia inziaklut chhungkaw 1423 leh inziahluhna man sang ber Rs. 10,000 senga inziaklut chhungkaw 768 an awm bawk a. August ni 1,2025 atanga inziahluhna hun hawn thar leh mekah hian inziahluhna rate erawh a hma aiin a sang a. Inziaklut duhte tan Rs. 3750, Rs. 7500 leh Rs.15,000-ah te duh thlan theih a ni.