Awlsam zawka sawrkar kaltir dan tur sawidun

Chief Minister Lalduhoma chuan nimin khan a Office-ah Special Secretary leh Task Force on Deregulation and Reduction of Compliances Burden-a Member Secretary KK Pathak chu a Pisa-ah kawmin awlsam zawka sawrkar kaltir dan tura rawtna te an sawidun.

He inkawmna ah hian Chief Minister chuan KK. Pathak leh a thawhpuite chu lo lawmin, an hmalakna chuan India ram leh Mizoram tan rah tha a thlen a beisei thu a lo hrilh a. Ease of Doing Business lama a kaihhruai sawrkarin hma a lakna tlangpui lo hrilhin, kal dan tha zawk a awm phawt chuan a tul anga insiamtha turin an inpeih reng thu a sawi bawk.

He hunah hian KK. Pathak hian niminpiah lama Mizoram Chief Secretary nena an inkawmna leh Mizoram kalphung an zir dan te Chief Minister hnenah hian a thlen a. Mizoram sawrkar hmalakna chu a tha thawkhat hle nia a hriat thu leh amaherawh chu dan paih thawl ngai (deregulate) tur dang pawh a la awm nuala an hriat thu a sawi a. India ramah Micro Small & Medium Enterprises bultanna leh hmasawn zelna tur remchang tam se a duh thu sawiin, “MSME hmasawnna lamah hian kan thenawm ram te aiin kan chak lo deuh niin kan inhria a, anni lehpel a, kan ram economy chawikan nan MSME hi chak zawka kaltir kan duh a ni,” tiin MSME hmasawnna tur chu an dah pawimawh ber thu a tarlang a ni.

He Task Force hi sawrkar laipuiin MSME te tana Ease of Doing business (Awlsam zawka sawrkar kaltir dan) zawng tura a din a ni a. Cabinet Secretary chu Chairman niin Central leh State sawrkar kalphung siam that ngai te zira a tul anga insiamrem dan tur rawttu an ni a. He hunah hian Building Law awlsam zawk leh hmasawnna hnathawh dawna Forest Clearance awlsam zawka neih a nih theih dan tur te pawh an sawidun nghal bawk a ni.

Hemi hmalam niminpiah khan KK. Patha ho hian Secretariat Conference Hall-ah Review Meeting neiin State-in deregulation a kalpui mek chungchang thlirho a ni a, phurrit tihziaawmna lam hawia State sawrkarin dan hrang hrang, abikin sumdawnna lam hawia a lo zam te siam that dan tur chungchang pawh sawiho a ni a. Department hrang hrangte’n sumdawnna awlsam zawka kalpui theihna tura dan tul lo siamte an tihbo theih dan tur chungchang sawiho niin tuna hmun hran hrana clearance neuh neuh ngai te leh permit kalpui dan rei tak te hian sumdawnna thar bultanna tur a tikhawtlai thei a, siam that tur emaw, hluihlawn turte pawh engemaw zat chu a awm dawn tih tarlan a ni a. KK. Pathak chuan Department hrang hrang hotute chu an Department theuhah hetiang mipuite tana thiltih awlsamna tur leh sumdawngte leh thil siamna din turte tana approval leh clearance awlsam zawk leh rang zawka tihfel a nih theih nana hmala zel turin a fuih a ni.