Buaina thleng sawiho; Police ten mi 2 an man tawh

Zirtawpni kaltaa Independence Day Football Tournament 2025 khelh zawh taka buaina thleng chungchang chu nimin khan Serchhip-ah Bawrhsap Paul L. Khuma hovin sawiho a ni.
He sawihona hun Serchhip DC Meeting Hall- neih ah hian Serchhip Police hotute bakah tlawmngai pawl atangin YMA, MHIP leh MUP; Sports lam atangin SDFA leh Serchhip District Sports Committee aiawh bakah Serchhip Vengchung VCP leh Branch YMA President te tel tura tih an ni a, he hunah hian Independence Day Football Tournament-a buaina thleng leh hemi hnua thil thleng zui chungchang te sawiho niin, he thil thleng chungchanga Police leh DFA te hmalak zuina te pawh sawi a ni bawk.

Tun tum Football Tournament Final-ah hian inkhel entu lamah buaina tenau chhuakin hemi ni-a Police duty te pawh mi thenkhat ten an tawng a, he thil thleng hi Police te chuan chhui zuiin mi thenkhat thu zawhfiah tura an lak zingah mi pahnih te chu thubuai siam sak ni tawhin District Jail-ah dah an ni tawh nia thudawn a ni a, heng mite laka thubuai ziahluh hi thuneitu sang zawk atanga tih a nih avangin case hi hnukir mai theih ni tawh lovin Court lamah ngaihtuah zui a ngai dawn nia thudawn a ni.