BSF Sipai lakna tur CM in lawmawm a ti

Chief Minister Lalduhoma’n Union Home Minister Amit Shah hnena a dil Mizo thalai 300 te Border Security Force (BSF)-a lakna tur Advertisement a chhuak chu lawmawm a tih thu a sawi.

Chief Minister hian Social Media kaltlanga he thu hi sawiin, Union Home Minister Amit Shah hnena a ngenna angin Border Security Force (BSF)-ah Mizo thalai mipa 255 leh hmeichhia 45 lak a ni tur chu lawmawm a tih thu a sawi a, Advertisement chu BSF website-ah dah a ni tih sawiin, Mizo thalaiten ngaihven turin a duh thu a sawi a ni. Chief Minister chuan India sipai (Armed Force) Agniveer lakna kalpui mek a ni tih sawiin, MLA Lt. Col. Clement Lalhmingthanga chuan a vil reng a, a diltu Mizo thalai 1000 chuang atangin Medical paltlang hi 163 an awm tawh a, Medical Review ngai, beiseina sang tak an neihna 39 an awm tih sawiin, Sport Quota atangin 12 an tling a, Medical review ngai 3 an awm tih a sawi bawk.

Chief Minister Lalduhoma chuan Mizo Territorial Army (Home & Heart) chu kumin November thlaah khian mi 70 lakna kalpui a ni dawn tih pawh sawiin, he hna dil tum tan MYC biakpawh theih reng ann nih thu leh nakum lamah pawh lak belh zel theih an beisei tih a sawi bawk.

BSF sawi danin BSF sipai lak tur hi mipa 255 leh hmeichhia 45 a ni a, Mizoram-a cheng, Schedule Tribe tan bik dil theih a ni a. September ni 1 atanga ni 18 chhung dilna hi thehluh theih niin kumin August ni 1-a kum 18 tling chin, kum 28 aia upa lo tan dil theih a ni a, diltu chu pawl 10 pass a ni tur a ni. Sipai lakna hi Serchhip, Champhai leh Khawzawl District tan Serchhip Stadium-ah neiin Lunglei, Hnahthial, Lawngtlai leh Siaha District tan Lunglei-ah leh Aizawl, Mamit, Kolasib leh Saitual District tan RG Stadium, Mualpui-ah neih tur a ni ang.