Mizoram-a lut tur ILP pekchhuah an tam avangin MZP in an ngaih a tha lo tih an sawi
Mizo Zirlai Pawl (MZP) General Hqrs. chuan nizan hmasa a Hnamdang Mizoram luh tum te’n Vairengte ILP Check Post-a buaina an siam chu an duh lo takzet tih sawiin, niminpiah-a hnamdang (Vai) lo luh tumte hi ni dang aia tam fe an nih avangin an ngaih a tha lo tih an sawi bawk.
MZP General Hqrs. hruaitute hian nimin khan thuchhuah siamin August 18, 2025 zan-a Hnamdang Mizoram luh tum ten Mizoram Vairengte ILP Check Post-ah buaina an siam chu an duh lo takzet tih sawiin, niminpiah-a vai lo luh tumte hi ni dang aia tam fe an nih avangin an ngaih a that loh thu leh Assam Sawrkarin Bangladesh Muslim Illegal Migrant hnawhchhuah an kalpui avangin Mizoram-ah vai an tam ta ah an ngai tih an sawi a. Hemi chungchangah hian nimin khan Home Minister K. Sapdanga chu a Pisa-ah hmuin Assam-in dan lova an rama awmte an hnawhchhuah mek hi Mizoram in kan tawrh theih avangin ramri-ah Sipai leh Police tam zawk duty dah tur leh Assam atanga lo lut turte chu uluk taka an document-te check tura an duh thu an thlen a. Central Armed Police Force (CAPF) Sipai lak chhuanlama dan lova vai an lo luh loh nan theihtawp a inven a tul thu thlenin, Home Minister hian theihtawp chhuah a tum thu leh duty pawh an uluk thu a lo hrilh niin MZP te chuan an sawi.
MZP chuan August thla chhungin mi 2,573 hnenah ILP pekchhuah niin chawhrualin ni khat-ah mi 140 vel pek an nih thu leh August 19, 2025 khan mi 544 hnenah pek niin ni khata mi 544 zet an lo lut thut hi chu MZP ngaih a tha lo tih an sawi a. “Tunhma atanga kan hnam himna tura MZP in tha a lo thawh tawh thin dan angin harsatna lian zâwk a thleng a nih chuan MZP chuan kan hnam himna atan theihtawp a chhuah leh zel dawn a, kan tunlai boruak awm mek hi Mizo mipuite pawhin ngaihven a, sawrkar hmalakna ah leh he thilah hian beng lo chhi ve turin Mizo mipuite kan inngen nghal bawk a ni,” an ti.
Assam sawrkarin Bangladesh Muslim Illegal Migrant a hnawhchhuah avanga Mizorama lo lut an awm chuan an chungah eng pawh thleng se MZP chuan mawh an phur dawn lo tih sawiin, Mizoram a hnamdang awm zingah Bangladesh atanga lo lut an awm leh awm loh a rang thei ang ber a dapchhuak turin sawrkar an ngen bawk.