Bana Kaih Scheme Phase-II kalpui dan tur sawiho

Mizoram State Policy Coordination Committee chu nimin khan thukhawmin Mizoram Sawrkar Flagship scheme 'Bana Kaih Scheme Phase II’ kalpui dan tur ngaihtuah a ni.

He thutkhawm Planning & Programme Implementation Department Committee Room-a neih hi MSPCC Vice Chairman leh Adviser to CM (Handholding) Dr. KC. Lalmalsawmzauva chuan kaihruaiin Mizoram Sawrkar Flagship 'Bana Kaih Scheme' hmanga ram tih hmasawn hna thawhpui tur 'Progress Partner' thlanchhuah hna thawhkhatna chu tha taka kalpui a nih thu a tarlang a. Mizoram Sawrkar hnuaia Department 16 kaltlangin theihna leh thiamna nei, eizawnna bultan tum te leh hma la tawh ten an hmalakna tichangtlung lehzual turin Bana Kaih Scheme hnuaiah dilna an thehlut tih sawiin, diltu 11456 an awm thu a sawi a. Implementing Department-a Nodal Officer-te, Bank lam te leh Apex Body-in uluk taka a zirchian hnuah Bana Kaih Scheme (Loan Component) hnuaiah mi 646 thlan an ni a, Chief Minister's Special Package hnuaiah mi 2,257 thlanchhuah a nih tawh thu a sawi.

Progress Partner thlan chhuahte tan hian Orientation training-te buatsaih niin an Bank Account-ah an hmalakna tur sum hi thun mek zel a nih thu pawh sawiin, Bana Kaih Scheme hnuaia Progress Partner-te tha tih chakna tura loan ruahman sak ah hian Sawrkar chu guarantor ah a tan bakah loan an lak atanga a pung awmte a rulh sak dawn avangin hlawhtling tura theihna leh thiamna nei, mi taima leh rintlak chauh thlan chhuah an nih zel theih nan fimkhur a tul thu a sawi bawk.

Nimin-a thutkhawmah hian Bana Kaih Scheme dilna thehluhna Portal ennawn niin siamthat ngai laite sawiho a ni a. Portal siamthat a, engemaw chen tih danglam a ngaih dawn avangin dilna thehlut tawh, ennawn tura Portal-a la awm mekte chu Portal thar hman theiha peihfel a nih hunah a thara thehluh a tul leh tur thu sawi a ni. CM Special Package dilna form ennawn a nih bakah Online-a dil theiha ruahman dan tur te, Progress Partner tur chu kum 18 atanga kum 60 inkar nise tih a ni a, Mizoram Khadi & Village Industries Board chu Implementing Agency ah telh thar a ni bawk a. Dilna lut tawh engemaw zat ennawn niin Commerce & Industries hnuaia dilna 18 ennawnte chu pawm a ni.

He hunah hian hmalakpui tura thlanchhuah Progress Partner-te loan dilpuina tur Detail Project Report (DPR) kimchang, awlsam taka siam a nih theih nana Application buatsaih thlirho a ni a. Bana Kaih Scheme Phase II kalpui leh hmain Implementing Department hrang hrang hnuaia Nodal Officer-te tan DPR siamna application software hman dan training buatsaih dan turte sawiho niin Bana Kaih Scheme Phase II chu August thla chhunga kalpui hman tum a nih thu tarlan a ni.