National Handloom Day vawi 11-na hman a ni

National Handloom Day vawi 11-na chu nimin khan Aizawl-a Millenium Centre Rooftop-ah hun hman a ni a, naktuk, August ni 9 thleng Puantahtute kutchhuak phochhuahna, Handloom Expo neih nghal a ni ang.

Commerce and Industries Department-a Deputy Director (HTM), Hunthianghlimi chuan Weavers' Service Centre, Ministry of Textiles te nen tangrualin Commerce & Industries Department chuan National Handloom Day vawi 11-na chu Millenium Centre Rooftop-ah buatsaih a ni tih sawiin, he hunah hian hmun hrang hranga puantah lama eizawng mi 100 chuang an kalkhawm a, Ministry of Textiles-in pawisa a pek hmangin National Handloom Day pual hian Puantahtute kutchhuak phochhuahna, Handloom Expo neih nghal a ni a, Stall 30 hawn a ni. 

Hunthianghlimi chuan puantah chu eizawnna tlak a nih thu sawiin, Handloom-a eizawng turin sawrkar laipuiin tanpuina tam tak a siamchhuak a, thalaite mahni kut-ke a ding turin Handloom-ah eizawnna a awm a ti a, pawl 12 pass chin tan Diploma in Handloom Textiles & Technology kum 3 leh a chanve zir tur a awm a, heta zirchhuakte tan hian Central Scheme direct in a hmuh theih a, sawrkar laipui chuan thalaite tan vocal for Local tiamin platform tam tak a buatsaih a, kumin ah he diploma zir tur Mizo thalai an hmu zo lo chu Department-a thawkte tha a na hle tih a sawi a, Mizo thalaite chu Handloom field-a lut tura sawmin, Puantahtute tu leh fate tan Scholarship leh Insurance hrang hrang a awm thu leh sawrkar laipui chuan Handloom chu eizawnna tlak a ni tih a hriat avangin hemi pual hian sum tam tak a dah tih a sawi a ni.

National Handloom Day hmanna pui ber- Bharat Mandapam, New Delhi-a President Droupadi Murmu hova hmannaah Commerce & Industries Department chuan Mizoram atangin puantahtu mi 5 a tir a, he hun lawmna pakhat Central sawrkarin Handloom Haat Janpath, New Delhi-a 'Exclusive Handloom Expo' ah Mizoram aiawhin Lapar leh Fungki te an tir bawk a, an Stalls a lunin an inhralh tha hle tih a sawi bawk.

Weavers’ Service Centre (WSC) Aizawl HoO Asst. Director Utpal Ch. Baro chuan National Handloom Day chu kum 1905-a Swadeshi Movement hriatreng nan kumtin August ni 7-ah hman thin a nih thu sawiin, he ni hi India puantah lama hausakna chawisanna leh puantahtute thlawpna atana hman thin a ni tih a sawi a, puantah lama thawk tha te hnenah Sant Kabir Award leh National Award-ah an hlan thei chu lawmawm a tih thu a sawi a ni.

National Handloom Day hi Mizoram hmun dangah te pawh hman a ni a, Sailam Cluster-ah Bialtu MLA Baryl Vanneihsangi chu Khuallian a ni a, Tuirial cluster-ah Higher & Technical Education Minister Dr. Vanlalthlana chu khuallian a ni bawk.