Aug. 4-9, 2025-ah 'Lirthei Tlan Chawlh' puang

Lirthei-a eizawng pawl hrang hrang 22 inzawmkhawm te chuan Mizoram chak lakluhna kawngpui pawimawh a rang thei ang bera siamtha turin karleh Thawhtanni August ni 4, 2025 atanga August ni 9 inkar chhung 'Lirthei Tlan Chawlh' an puang dawn.

    Nimin-a Mizoram Truck Driver Association (MTDA) General Hqrs. Office, Hunthar Veng-a thuthar thehdarhtute an kawmnaah Chief Convener Robert Lalrinawma chuan kawngpui siam mek te hi an thlithlai reng thu sawiin, lirthei tlanna tura a la that tawk loh avang leh kawngpui pawimawh ber Sairang atanga Vairengte (NH 306/06) inkar Khamrang kawngah lirthei tangkhang a tam avangin kawng siamtuten hnathawh a tibuai nia an sawi bawk avangin 'Lirthei Tlan Chawlh' puan an rel ta tih a sawi a. August ni 4 thlengin heng kawngpui-a lirthei tangkhang zawng zawngte chu lo inthiarfihlim tur leh sawrkar pawhin heng lirthei te hi lo chhuah turin an ngen tih a sawi a, kawng siam chhungin hnathawktu ten thawl taka hna an thawh theihna tur leh kawng tha taka an siam theihna turin lirthei tlan lo turin an ngen tih an sawi a. Kawng chhiat chhanah NHIDCL leh Mizoram sawrkar inpuhtawn chu tha an ti lo tih sawiin, NHIDCL chu hnathawktu a ni a, Mizoram sawrkar chu State neitu a nih angin Mizoram sawrkar chuan chak takin hma la se, NHIDCL chu chak takin nawr se an duh tih a sawi bawk.