Sainik dinhmun thlirho

Sainik Welfare & Resettlement dinhmun bihchianna leh an hmalakna thlirletna hun chu Home Minister K. Sapdanga hovin niminpiah khan neih a ni.

Directorate of Sainik Welfare & Resettlement-a he hun hman ah hian Home Minister K. Sapdanga chuan Sainik Welfare & Resettlement chu Ex-Servicemen-te enkawltu an nih angin anmahni chhawmdawl leh hamthatna an dawnna kawngah theihtawp a chhuahpui zel tur thu a sawi a. Ex-Servicemen-te chu mi in vawng, mi taima leh training tha tak lo nei tawhte an nih avangin ram venhim bakah khawtlang tan mi tangkai leh chhawrtlak an nih thu sawiin, sawrkarah pawh lut se rinawm tak leh tha taka hna thawktu an nih tur thu a sawi a. Home Department hnuaia hna lak a awm leh hunah pawh Ex-Servicemen a tam thei ang ber an luh theih nan an inbuatsaih thu a tarlang bawk.

He hun hi Home Secretary Vanlalmawia chuan kaihruaiin Addl. Secretary Andrew H. Vanlaldika pawh he hunah hian a tel a ni.

Tun dinhmunah Mizoram-ah Registered Ex-Servicemen 6,355 leh Registered Widows 2,550 an awm a. Sainik Welfare & Resettlement hian Aizawl, Lunglei, Champhai leh Kolasib-ah te District Office neiin, Office atan mimal In luahna District-ah te Office sak dan tur ngaihtuah a ni a. Integrated Sainik Rest House/Complex sak tharna tur leh War Memorial thar din tura hmalak mek a ni bawk. State sawrkar hmalakna in Ex-Servicemen leh an chhungten (dependent) a thlawna Computer an zir theihna tur Sainik Computer Training Centre chu kum 2003 atang khan hawn niin, he Centre atang hian mi 389 in an zirchhuak tawh a ni. Ex-servicemen-te hian Group B (non-gazette) chin post hrang hrangah reservation an nei a. Sawrkarin Ex-Servicemen-te tan hamthatna hrang hrang a siamte chu dawng an awm nual rualin, documents neih kim loh avanga dawng thei lo an awm thin thu tarlan a ni bawk.