VUC leh sawrkar thawhhona a tha tih sawi

Zoram Peoples’ Movement (ZPM) Party, Val Upa Council (VUC) Chairman Lal Fakzuala, IAS (Retd) chuan Mizoram sawrkar leh ZPM party nen thawhhona tha tak an nei tih sawiin, thawhhona tha lehzual nei turin ruahmanna an siam mek thu a sawi.

Zalen-in a biaknaah VUC Chairman chuan VUC din a nih atanga tun thlengin an hmalakna leh an hnathawh dan an tlangzarh ngai lo tih a sawi a, hetihlai hian sawrkar leh ZPM party lam nen thawhhona tha tak an nei niin tih sawiin, “Sawrkar leh party lam pawhin VUC an zahder thiam niin kan hria,” a ti a. “Theihtawp chhuahin sawrkarin policy leh manifesto a neihte a tihhlawhtlin dan VUC-in a vil a, an tihhlawhtlin dan leh ngaihsak zui dante a en zui thin,” a ti bawk.

VUC Chairman chuan, ZPM party chu an vawi khat sawrkarna a la nih avangin thawhho dan hrim hrim pawh inzir chawpin an ti chho nia sawi bawkin, hmalak zel dan tur chak zawkte pawh an ngaihtuah chho mek niin a sawi a. “Tun aia chak leh tha lehzual zawka sawrkar nen a thawhho zel kan tum a, chutiang chiah chuan party nen pawh tha zawka thawhho chhoh zel kan tum,” a ti bawk.

July ni 17, 2024 a ZPM Legislature Party, VUC leh ZPM General Headquarters Elected Office Bearer te Chief Minister's Office Conference Room-a an inhmuhkhawmna ah ZPM Legislature Party Leader  leh Chief Minister Lalduhoma chuan, ro an rel danah tihsual palhte an nei thei tih sawiin, chu'ngah chuan VUC an mamawh thu a sawi a, zilhhauh an ngaihnaah rang taka thurawn pe turin VUC te a lo ngen tawh a. Chief Minister Lalduhoma chuan, VUC-in fim takin sawrkar hotute an uap tlat tih sawiin, “Kan tlan chak lutuk tur min veng a, kan kal muang lutuk tur min nawr a, kan bana min kaih tlat avangin ZPM party tan an hlu hle. Kan rorel dan leh thu kan tihtluknaah te 100%-in kan ti fuh vek seng lo mai thei, tihsual palhte pawh kan nei ve ang, chung ah chuan kan mamawh tur chu VUC hi in ni. Zilhhauh kan ngaih hunah rang takin rawn che u la, in thurawn hi engtik lai pawhin kan mamawh reng a ni,” tiin VUC te chu a lo chah tawh a ni.