Aizawl-ah hnianghnar in Tui sem theih a ni rih lo

Aizawl khawpui Tui-a chawmtu tura ruahman pakhat, Greater Aizawl Water Supply Scheme (GAWSS) Phase-III atanga PHE Department-in tui an pump theih loh vangin Aizawl khawpui ah hnianghnarin tui sem theih ala ni lo a, he harsatna hi chin fel thuai tum a ni.

Public Health Engineering (PHE) thawktute hnen atanga Zalen in thu a dawn danin GAWSS Phase I leh II atang chuan harsatna lian awm lovin tui hi pump theih ni mah se, hemi pahnih ringawt hi chuan Aizawl mipui mamawh a phuhru zo lo tih an sawi a. Phase I atang hian ni khatah tui 10.8 mld leh Phase II atangin ni khatah tui 24 mld pump theih a ni a; mahse, nileng (24 hrs)-a pump theih a nih loh avang leh mipui hnen a thlen hmaa tui bothlau a tam avangin hnianghnarin tui hi an la sem thei lo niin an sawi.

PHE thawktute chuan 37 mld pump theihna, GAWSS Phase III a that lai chuan tui pump leh sem kawngah harsatna an tawk lo nia sawiin, thla khatah vawi thum vel consumer-te hnenah an pek theih thin avangin harsatna a awm lo niin an sawi a. Tun dinhmunah Aizawl khawpuiah tui connection hi 84,000 bawr vel a awm mek tih an sawi bawk.

PHE Department-a thawktute chuan GAWSS Phase III atanga tui an pump theih loh chhan chu power pekna ber, Sihhmui Sub-Station khawl a kan vang leh Vaivakawn Zohnuai a pipe lian a chhiat vang niin an sawi a. Sihhmui Sub-Station siam that a nih hma chu harsatna hi a la thleng dawn nia sawiin, tui pump-na atan hian hmundang atangin power hi pe mah se, khaw dangin an tuar thin tih an sawi a. Hei mai bakah Vaivakawn Zohnuai-a pipe siam dan tur pawh Minister hovin Official leh khawtlang hruaitu ten an sawiho tawh thu an sawi a, siamthat thuai a nih an beisei tih PHE Department-a thawktute chuan an sawi bawk.