Oil Tanker te an tlan loh avangin Mizoram hmun hrang hrangah tuialhthei a harsa nghal

Mizoram Oil Tanker Driver Association (MOTDA) ten Kawnpui leh Sairang inkar kawng chhia avanga lirthei an din tir avangin Mizoram hmun hrang hrangah tuialhthei harsatna a thleng chho mek.

MOTDA President Romel Lalruatdika chuan a hma lama thuchhuaha an lo tarlan tawh angin Inrinni atang khan kawngchhia avangin an lirthei an din tir tan thu leh Oil Tanker khalhtuten an zawm that thu a sawi a. Sairang leh Kawnpui inkar kawngpui chu tlan ngaihna a awm tawh loh thu sawiin, a kal apiang an tan loh leh an tlu niin a sawi a. Kawngchhia avangin hun rei tak tak kawngah an cham thin thu a sawi bawk. MOTDA President chuan kawngpui chu black top beiseia an nawr loh thu sawiin, black top mai theih a ni lo tih chu an hre ve reng a, hetihrual hian a chhe zual leh a khuar zual lai chu hnawh sak tura thuneitute an beisei thu a sawi a. Hnawh chauh hi chuan rei a daih dawn chuan loh avangin hnawh mai bakah Roll tel tura an phut thu a sawi a. Sawrkar lam nen inbiakna an la neih loh thu pawh sawiin, thuneitu leh a kawng siam mektute ngaihchan rih chu an tihtheih awmchhun a nih rih thu a sawi a. Inrinni atang khan Oil Tanker pakhatmahin load an lak loh thu leh Guwahati-a Northeast Petroleum Mazdoor Union te pawhin aan thlawp thu sawiin, Mizoram Tipper Owners & Drivers Association, Kolasib te leh ‘Fak Hlawh Lo Val Rual’ tih pawl ten thuchhuah siama an thlawp thu an sawi chu lawmawm an tih thu an sawi bawk.

Mizoram Oil Tanker Driver’s Association te hian Sairang leh Kawnpui inkar kawngpui chu tlan theih pangngai a nih hma chu an tlan dawn rih loh thu an lo sawi tawh a. Kawng khuar chu tlan ngaihna awm lo leh a lirthei khalhtute nunna atan pawha hlauhawm a nih thu sawiin, a bik takin Oil Tanker te chu an chetsuala kangmei a chhuah theih avangin an tan a hlauhawm bik thu a sawi a. Thuneitute lam, a kawng siam mek tu a ni emaw, sawrkar lam a ni emaw la ngaihchan zel an tum tih an sawi a ni.

Hetianga tuialhthei phurte an tlan ngam loh avang hian Aizawl leh Mizoram hmun hrang hrangah tuialhthei harsatna a thleng chho nghal a, hmun thenkhat ah dan pangngaia tuialhthei hralhchhuak thei la awm mah se hmun tam zawkah chuan semrual te a ni a, Petrol pump hrang hrangah tuialhthei lak tum thui tak taka intlar an awm bawk a ni. Food, Civil Supplies & Consumer Affairs Department hotute chuan kawng chhia ah tuialhthei phur tangkhang an tam avangin Petrol leh Diesel thleng tha lo mah se tuialhthei chu lut lo tawp a ni lo tih an sawi a. Petrol Pump tam takah tuialhthei ala awm thu sawiin, mipuite tan chi-ai hluai na tur a awm rih lo ah an ngaih thu an sawi bawk a ni.