Union Minister hnenah Mizoram mamawh thlen

New Delhi-a cham mek Minister Lalnghinglova Hmar chuan nimin khan Union Minister for Sports & Youth Affairs Dr. Mansukh Mandaviya chu kawmin Mizoram-a ESI Hospital din leh Sports Stadium sak chungchang a sawipui.

Union Minister for Sports & Youth Affairs chenna, Tughlaq Road, New Delhi-a an inkawmna ah hian LESDE Minister Lalnghinglova Hmar chuan Employees’ State Insurance (ESI) Scheme hnuaia damdawi In din chungchanga Mizoram mamawh Union Minister hnenah hian a thlen a. ESI Scheme hnuaia damdawi In khum 30 awmna sa turin mi 15,000 tal inziahluh a ngai a, hei hi State te leh mihring tlem, Industry lian awm lohna Mizoram tan tlin a har tih a sawi a. “Sumdawnna hmunah te ESI Scheme chungchang inhrilhfiahna leh inziahluh runpui kalpui a ni a, tunah zirna In-ah kalpui leh mek a ni. Hmasawnna a awm chungin target hi tun dinhmunah phak mai a harsa rih a, ngaihhnathiam rih kan ngai,” tiin, khum 30 emaw a aia tam awmna damdawi In sak dilna a thlen a ni.

Sports Minister ni bawk Lalnghinglova Hmar chuan July 1, 2025 a Union Cabinet Meeting in National Sports Policy (NSP), 2025 a pass avangin Union Minister hi lawmpuina a hlan a. “Indian Football-ah Mizoram in dinhmun sang a luah chho mek a, Indian Super League leh I-League Season hnuhnung berah pawh State angin Mizoram player-te'n an khel tam ber. Tuna kan thlen chin atanga hmasawn zel tur erawh chuan infrastructure tha kan neih belh a ngai a, State dang nen khaikhina zahpuiawm lo tur Football Stadium kan mamawh,” tiin, NSP thar zulzuiin PSU rintlak thawhpui tur zawnsak turin Union Minister a ngen a ni.

He hunah hian Dr. Mansukh Mandaviya chuan Mizoram Minister ngenna chu a ngaihpawimawh thu leh ESI hnuaia damdawi In sak chu tihsak ngei a tum tur thu a lo hrilh a. Football-a Mizoram hmasawnna chu lawmawm a tih thu pawh sawiin, National Sports Policy thar chuan Indian Sports-ah a tha zawnga danglamna a thlen ngei a beisei thu a sawi a. Mizoram-a Football Stadium mai ni lo, Sports Infrastructure hmasawnna atana thawhpui tur PSU thlan thuai a nih tur thu leh PSU hotute nena Meeting hunah pawh Mizoram Sports Minister chu a koh tel ngei tur thu a lo hrilh a ni.

Mizoram-a Sports ruhrel hmasawnna’n Khelo India hnuaiah Multidisciplinary Indoor Stadium sakna tur cheng vbc. 11.5 te, NESIDS-OTRI hnuaiah Indoor Stadium pathum sakna tur cheng vbc. 38.4 te, PMJVK hnuaiah Hnahthial-a Synthetic Hockey Turf phahna tur cheng vbc. 9.886, Thenzawl-a Artificial Football Turf phahna tur cheng vbc. 11.85 leh Champhai-a Artificial Turf phahna tur cheng vbc. 12.01 te chu tunhnaiah approve tawh a ni a, hna tan thuai thei turin tan lak mek a ni.