Leader of Opposition leh Principal AG inkawm

Mizoram Legislative Assembly-a Leader of Opposition leh Public Accounts Committee (PAC) Lalchhandama Ralte leh Principal Accountant General (Mizoram) Samar Kant Thakur (IAAS) te chu nimin khan inkawmin Sawrkar Department-te pawisa hmanralna uluk taka enzui a tul thu an sawi.

Leader of Opposition Pisa, Assembly Annexe-a an inkawmna ah hian Principal Accountant General (Mizoram) Samar Kant Thakur chuan PAC tel lovin Mizoram AG Office chuan hna an thawk thei lo tih sawiin, an hna pui ber pawh PAC hnathawh report pek a ni, a ti a. Leader of Opposition Lalchhandama Ralte pawhin PAC chuan theihtawp chhuaha hna an thawh thu leh tunhnaiah pawh Mizoram khawchhak lam leh chhim lamah Site Visit neia an fehchhuah thu a sawi bawk.

Principal Accountant General hian PAC Chairman Lalchhandama hnenah rawtna thlenin, Mizoram PAC chu Central PAC kalphung anga kal ve tur a duh thu leh a tul a nih chuan Workshop/Seminar buatsaih tura a inpeih reng thu a sawi a. Comptroller & Auditor General of India hnena PAC report chu thlen chu an hnathawh ber a nih thu a sawi bawk a. PAC hmalakna ah Judiciary a huam leh huam loh sawihonaah Principal AG chuan, High Court leh Supreme Court thlengin a huam tih a sawi a. Amaherawhchu, Office establishment chauh an khawih thei thung tih a sawi a. PAC pawimawhna sawiin, Sawrkar Department leh Ministry-te excess expenditure chu PAC chauhin a regularize thei a, a process muang deuh mah se, PAC hnathawh chu a effective hle tih a sawi bawk.