MSPCC ten Bana kaih Scheme sawihoin Loan dilna 68 pawm in an sanction a ni tawh

Mizoram State Policy Coordination Committee (MSPCC) chu nimin khan an Vice Chairman Dr. KC. Lalmalsawmzauva kaihhruaiin an thukhawm.

He thutkhawm P&PI Department Conference Hall-a neih ah hian State Flagship Programme, Bana Kaih Scheme hnuaia thu pawimawh hrang hrang sawihoin MSPCC member-te bakah District tin Deputy Commissioner te (virtual in) leh Implementing Department Nodal Officer leh Partner Bank Nodal Officer te bakah MKVI Board CEO te an tel a. Dr. KC. Lalmalsawmzauva chuan Chief Minister’s Special Package pekchhuah chungchangah District tin DC te mawhphurhna sawiin, tanpuina dawng tura thlanchhuah te hi July thla chhunga District Level Orientation Training buatsaih turin a chah a. Phase-I hnuaia Loan Support dawng thei tur Progress Partner thlan tharte atana Orientation Training lo buatsaih pawh DC te hriattir an nih tur thu a sawi a. Phase-I hnuaia loan dilna ‘under assessment’ te pawh Department te’n tun July thla chhunga tifel vek hman turin a chah bawk.

He thutkhawm a Partner Bank te hnen atanga report dawn danin a vaiin Bank pathum- SBI, MRB leh Apex Bank ten Bana Kaih Loan dilna an hmuh atangin 68 chu pawm in an sanction tawh a. District Bawrhsap, Implementing Department leh Partner Bank aiawh te atangin harsatna an tawh leh zawhna an neih thawh a sawihona neih a ni bawk.

Bana kaih Phase-II atana inbuatsaih lawkna chungchang pawh nimin a thutkhawm ah hian sawiho a ni bawk a, hemi atan hian Local Level atanga bultan a, inzirtirna leh inhrilhhriatna tha zawk neih sawiho a ni.