UG Exam tithate chawimawi

Mizo Students’ Union (MSU) General Hqrs. chuan kumin-a Under Graduate result chhuaka Mizo Topper mi 24 te chawimawina hun nimin khan an buatsaih a, he hun hi EF&CC Minister Lalthansanga chuan khuallian niin a hmanpui a ni.

Aizawl Vanapa Hall-a he hun hman ah hian EF&CC Minister Lalthansanga chuan kan tunlai khawvel chu Global Village anga kan inhlawmkhawm tawh avangin kan changkang tawh tih sawiin, ram changkang zawkte tihdan pawh entawn a awlsam tawh thu a sawi a. Chutihrualin mahni hnam nunphung kalsan lo tura zirlaite fuihin, hlawhtling tak tak tur chuan teirei peih a pawimawh a. Minister dinhmun thleng tur hian kum 1993 atanga a beih tawh thu pawh sawiin, Teireina chuan hlawh-tlinna a tawpah a chantir thin thu a sawi a ni. 

Zirlai tithate chawimawina hun hi MSU General Hqrs. a General Secretary Zodinsanga chuan kaihruaiin khual zahawm leh Mizoram Cooperative Apex Bank (MCAB) Chairman Lalnunsanga pawhin MSU in Zirlaite fuihphurna atan leh tihhmasawnna atana lawmpuina hun an buatsaih chu tha a tih thu a sawi a. Kan ram kan hnam tana rotling thalai ni zawm zel turin zirlaite chu a fuih a. MSU President B. Lalkhawngaih-zuala pawhin ram leh hnam hmangaih turin zirlai kalkhawmte chu a fuih a, ram leh hnam hmangaih lo Officer leh Politician te chu ram leh hnam tan an hnawksak tih pawh sawiin, Aia upa te zahthiam a, kan zirthiamna in Zonun zemawi hliahkhuh lo se, nakin thlenga lawmpui zel tlak mi hlawhtling a inchherchhuak turin Zirlai passed lawmpuina an hlan te chu a chah bawk a ni.

Nimin-a he hun hman ah hian Under Graduate Mizo Topper mi 24 te hnenah lawm-puina thuziak leh pawisafai hlan an ni a, MSU Senior Adviser Lalhmachhuana Zofa chu Honorary Doctoral Degree a dawn lawmpuina thuziak an hlan bawk a ni.