LMC in kawngpui leh a vel cheina leh siamthatna atan Police hnenah cheng nuai 5.41 an hlan

Lunglei Municipal Council (LMC) chuan Lunglei khawpui chhunga lirthei leh mipui chetvelna (traffic) him leh felfai zawk a awm theih nana kawngpui leh a vel cheina leh siam thatna atan kum 2024-2025-a lirthei hun man (parking fee) an khawn chhuah atangin Rs. 5,41,075/- chu nimin khan Lunglei District Police kutah an hlan.

He sum inhlanna hi LMC Chairman Pindan-ah LMC Vice Chairman leh Traffic & Transport Coordination (TTCC) Committee Chairman K. Lalrinawma kaihhruaiin neih a ni a, LMC Chairman Lalzuithanga chuan Lunglei District Superintendent of Police (SP) J. Lalmuankima kutah sum hi a hlan a, LMC Chairman Lalzuithanga chuan LMC-in faina leh thianghlimna (sanitation) leh lirthei tlan dan leh hun dan ruahmanna (traffic management) a ngaih pawimawh thu leh hma a lak chhoh mek thu leh a taka hmalatu, LMC leh TTCC kutke ber leh an rinchhan ber chu SP leh Traffic Police te an nih thu a sawi a. Lunglei SP J. Lalmuankima chuan District Police te'n kawngpui leh a vel cheina atana an ruahmanna te a hlawhtlin theih nana LMC-in sum mamawh an pek avangin lawmthu a sawi bawk. He hunah hian LMC Chief Executive Officer Donny Lalruatsanga, Secretary Zoramdini te pawh an tel a ni.

LMC-in kum 2024-2025 chhunga Parking Fee a hmuh Rs. 18,31,349/- chu Board of Councillors (BoC) chuan Traffic kaihhnawih hrang hrang tihchangtlun nana hman tura relin, hemi atang hian Traffic kaihhnawihah leh kawngpui chhinchhiahna (marking) siam nan Rs. 4,86,275/- hman a lo ni tawh a. Sum bang la awm atangin tun tumah hian kawnglai cheina leh tilang fiahtu eng (reflector/road Stud Light) vuahna atan te, kawng kual laia darthalang (convex mirror) dahna atan te, chhinchhiahna hrang hrang siamna atan leh Tiang eng thei (Light stick), kawng danna chi hrang hrang (Barricade, tape, cone, sign post, etc.), lirthei ke chehna (wheel clamp) leh hmanraw mamawh hrang hrang leina atan Rs. 5,41,075/- chu District Police kutah hlan a ni a. Hei bakah hian tui luankawr khuhna tha lo siam that te, kawng leh kawngsir ke-a kalna daidanna pal (railing) rawng hnawih te, kawngpui luan chin baka lung phah leh hna tul dangte pawh la thawh chhunzawm tum a ni.