Nunphung dik zirna bul chhungkua a ni tih sawi

Social Welfare Department (SWD) Director Dr. Lalhriatzuali Ralte chuan thalai ten nunphung dik an zir theihna bul chu chhungkua a ni tih sawiin, ruihhlo do kawngah Kohhran leh Pawl hrang hrang nen tanrual a pawimawh thu a sawi.

Sawrkar laipuiin rampum huapa ruihhlo do beihpui a thlakna a kalpui mek, Nasha Mukt Bharat Abhiyan hnuaia Mizoram-a hmalakna chungchanga Akashvani Regional News Unit, Aizawl-in Social Welfare Director Dr. Lalhriatzuali leh Central YMA General Secretary Prof. Malsawmliana te a kawmnaah he thu hi sawiin Dr Lalhriatzuali Ralte chuan Mizoram in a mamawh chu ruihhlo ngaiten an sim theihna tur, De-addiction Centre bakah hemi hnua anmahni enkawl zuina tur, After Care Rehabilition niin a lang, a ti a, Social Welfare Department chuan chhungkua atanga bultan a pawimawh hle a an hriat avangin Kohhran leh pawl hrang hrangte nen thawkho a, hmalak an tum a, ruahmanna pawh mumal taka an siam thu a sawi bawk.

Central YMA General Secretary Prof. Malsawmliana pawhin Central YMA in ruihhlo ti khawlai-a riak thin te chu Home hrang hrang ah te an dah thin tih sawiin, TBCC, Sakawr-tuichhun leh OKM, Phunchawng te chu an dah tam berna te an nih thu a sawi a, heng Home te hian rawngbawlna ah ngaiin a leng zat aia tam an lo dawngsawng thin a, mutna indaihloh chang te a thleng fo thin tih swiin. Sawrkar leh mimal bakah hian Mizorama Kohhran liante chu hemi chungchanga hmala thei ber turah a ngai tih a sawi a, Kohhran hrang hrang ten Rescue Centre an neih sa te aia lian zawk siam thei se tha a tih thu a sawi bawk.

Nasha Mukt Bharat Abhiyan (Drug Free India Campaign) hi Ministry of Social Justice and Empowerment, Govt. of India hnuaiah August ni 15, 2020 khan hawngin kalpui mek a ni.