Transfer & Posting Rules hman theih leh hman ngam siamchhuah a ngai - Edn. Minister

School Education Minister Dr. Vanlalthlana chuan Transfer & Posting Rules hman theih leh hman ngam siam chhuah a ngai tih a sawi.

Mizoram Education Reforms Committee buatsaihin The Mizoram Education (Transfer & Posting of School Teachers) Rules 2025 chungchanga inrawnkhawmna chu nimin khan Aizawl-a School Education Directorate Conference Hall-ah neih a ni a, he hun hi hmanpuiin School Education Minister Dr. Vanlalthlana chuan “Zirtirtu transfer hi a hautak a, dilna thahnem tak a lut reng a, Teacher ten harsatna chi hrang hrang an nei a, nu leh pa enkawltu an nih avanga transfer dil te, politics thila transfer nawrna te, chhungte damlohna avanga dilte leh chhan tha tak tak neite an ni,” tiin dilna chinfel chu hna hautak a nih thu a sawi a. Zirtirtu tam tak mahni post-ah an awm lo tih sawiin, “Primary School-ah te hian zaa 45 hi mahni post a awm lo an ni,” a ti a. Tun dinhmunah thingtlang atanga Aizawla sawnluh an tamna chhan sawiin, “Zirtirtu Senior te hi Aizawl-ah post an tam a, an pension zel a, an aiawh post ruak hnawhkhat turin thingtlanga mi sawnluh zel an ngai a, Aizawl-a lut an tam lo thei lo a ni,” a ti a. Transfer & Posting Rules chu Mizoram Education Reforms Committee-in vawi tam tak an thlirho thu leh khawtin khawih leh thawktu ngah ber Department a nih bawk si avangin inrawnkhawmna buatsaih a ni tih a sawi a, “Transfer & Posting Rules hman theih leh hman ngam siamchhuah a ngai a ni,” a ti.

The Mizoram Education (Transfer & Posting of School Teachers) Rules 2025 chungchanga inrawnkhawmna hi School Education Department-a Special Secretary David Lalthantluanga chuan kaihruaiin School Education Director Angela Zothanpuii pawhin School Academic Session, School timing leh School Uniform chungchangah te inrawnkhawmna neih a lo nih tawh thu sawiin, tun tuma sawiho Transfer chungchang chu School Education Department-ah hna hautak tak leh lian, In leng pawh an tamna chhan ber a nih thu a sawi.

He inrawnkhawmna ah hian Mizoram Education Reforms Committee (MERC)-a Member Dr. Rohmingmawii chuan kum 2020 khan Gazzette meuh chhuahin Rules hi duan a lo ni tawh tih sawiin, State thenkhatte Rules enin a hman ve theih te enin siam a nih dan te, MERC in vawi engemawzat a thlirho tawh thu a sawi a. Online portal hman a nih dawn thu te, transfer theih hun chhunga transfer window a awm dawn thu te, inrawnkhawmna leh rawtna dawn atangin siamthat ngai lai te siamthat a nih dawn thu a sawi a ni. He inrawnkhawmna ah hian School Education Department-a Officer te, Service Association hrang hrang hruaitute leh mimal-a rawtna neite an tel a, siamthat an duh laite an sawi a ni.