Aizawl-ah lirthei chesual tam

Kumin-a kum chanve kalta, January atanga June inkar chhung khan Aizawl khawpuiah lirthei chesual vangin mi 10 an thi a, hliam 10 an awm bawk.

Aizawl Traffic thawktute sawi danin kumin January atanga June thla chhung khan Aizawl Traffic Police huamchhungah lirthei chetsualna hi tum 17 thlengin heng zinga tum 10-ah hian thihna a thleng a, tum thumah hliam awmin hliam tenau awmna pakhat leh inhliam awm lo chetsualna tum thum a thleng bawk. Lirthei chetsual chhan ber chu a khalhtu fimkhur loh vang a ni tih sawi bawkin, “Lirthei chetsualna chhanah hian a khawl lam fel loh vang emaw, a khalhtu hriselna dinhmun vang emaw, kawng dinhmun avang emawa chetsualna thleng a awm lova. Chetsualna thlengte hi a khalhtu fimkhur loh vang liau liaua thleng niin heng zingah hian rui chunga lirthei khalh avanga accident thleng pahnih a awm,” an ti. 

Lirthei chi hrang hrang chesual zat zawhna chhangin, “Lirthei chesual zawng zawng zingah hian Two Wheeler pakhat tih loh chu mahni maia tawhsual tawk ni lovin lirthei dang nena insu, intai palh an ni,” tiin lirthei chetsualna a tel te hi Two Wheeler 17, LMV paruk, MMV pali leh HMV pali, a vaiin 31 a ni tih an sawi bawk.

January-June, 2025 chhung hian lirthei dan bawhchhia man 4,327 an awm bawk a, heng zingah hian Two Wheeler tam berin 3,121 man a ni a, hei hi lirthei dan bawhchhia zawng zawng man atanga chhutin 72.12% a tling a. HMV 102, MMV 39, LMV 804, Bus 22, Taxi 233 leh a dang pathum an awm bawk a. Dan bawhchhiate sum chawitir tlingkhawm hi Rs. 38,81,500 a tling. Lirthei te dan bawhchhiat zingah MV rules bawhchhia 1,344, a hmun lova lirthei dah (no parking) 1,224, no turning 322, no entry 272, wrong side 240, driving license tel lova khalh 213, obstruct flow 185, dan zawm lo 172 leh helmet khum lo 142 te a langsar zual a ni.