Kawng chhia vangin harsatna a thleng zel; Oil Tanker ten tlan tawh rih loh an tum thu an sawi

National Highway-306 & 06, Kawnpui leh Khamrang inkar kawng a chhiat avangin nitin mamawh hrang hrang lakluh a khaihlak mek a, hetihlai hian Mizoram-a Tuialhthei phur lirthei khalhtute chuan Kawnpui leh Sairang inkar kawng chhia siamthat a nih hma loh chuan Vawiin atang hian tlan tawh rih loh an tum thu an sawi bawk.

Mizoram chak lakna kawng pawimawh, National Highway- 306 & 06, Kawnpui leh Khamrang inkar chhia avang hian Mizoram chuan harsatna a tawk chho mek a, he kawng paltlanga mamawh la thin khaw hrang hrang ten harsatna an tawk mek a ni. Helai hmuna harsatna thleng mek hi nimin khan Kolasib District Bawrhsap Robert C. Lalhmangaiha chuan a hmunah tlawhin Kolasib District-a National Highway 306 & 06 hi Assam leh Mizoram inkalpawhna pawimawh tak niin nitin Mizoram mamawh leh chakkhai chawkluhna kalkawng pawimawh tak a ni a. Tun dinhmunah helai kalkawng hi Fur khawchhia leh leimin in a nuai nasat avangin lirthei khalhtute'n harsatna an tawk nasa hle a, lirthei tangkhang engemaw zat a awm mek a ni. He harsatna sukiang tur hian NHIDCL hnuaia Contractor, BR Goyal Constructions Pvt. Ltd. chuan kawngpui thawmthat hna hi an thawk mek a ni.

Kolasib Bawrhsap ho hian lirthei tangkhang mumal taka chhuah dan tur leh Lirthei te him taka an in sulpel dan turte sawiho a nih bakah Excavator leh Lei laihna khawl dang leh thawktu tam zawk dah dan turte sawiho a ni a. Security leh IR Police dah belh dan tur pawh sawi a ni bawk a. Kalkawng hi tha taka siam a nih theih nan lirthei tlan te an chawlh lailawk dan tur sawiho a ni a, amaherawhchu Kawnpui to Khamrang kawng hi Mizoram luhka pawimawh tak a nih avangin State chhung mipui nitin mamawh Buhfai, Oil, Gas leh Damdawi phur lirthei erawh chatlak lova a kal dan tur erawh ngaihtuah a ni.

Hetihlai hian Mizoram Oil Tanker Drivers’ Association (MOTDA) chuan nimin khan thuchhuah siamin Kawnpui leh Sairang inkar kawng chhia chu Oil Tanker tan tlan a harsa in a him ta lo hle tih an sawi a, helai kawng chhia hi tlan theih pangngai a siam a nih hma chuan Vawiin, July 19, 2025 atang hian Oil Tanker te tlan rih loh nise an tih thu leh Oil harsatna a awm a nih pawhin mipuite hriatthiamna an ngen thu an sawi bawk.