Tling lo te chhawr zuina tur Order MSU in an hal

Mizo Students’ Union (MSU) General Hqrs. chuan Unqualified Part Time Asst. Professors mi 29 te chhawr chhunzawm zelna tura sawrkar in ‘Notification Order’ a tihchhuah duhlohna lantirnan nimin khan a copy an hal.

Hemi chungchanga MSU thuchhuah tarlan danin Part Time Asst. Professors sawrkarin a rawih mekte hi nikum August 9 khan February 28, 2025 thleng chhawr chhunzawmna lehkha tihchhuah ni tawhin, chuta a inziah danah chuan, “No more Extension of engagement will be done after 28.02.2025” a intih tawh hnuah February 21, 2025 khan hun pek belhna Notification tichhuak lehin pawi an ti hle tih an sawi a. Notification thar tihchhuah leh hi an duhloh zia entirnan nimin khan Higher & Technical Directorate kawt-ah Notification hi an hal a ni.

Nimin-a he hun hman ah hian MSU General Hqrs. President B. Lalkhawngaihzuala chuan Zirna tha siam tumin Zirtirtu Qualify lo te sawrkar in an ruai reng chu hriatthiam har a tih thu a sawi a. Zirtirtu Qualify lo ten zirna an pek theihna tur atana sawrkar in ‘Humanitarian Ground’ tia a chhawr chu ‘Humanitarian Ground chhuanlama langsar taka Dan bawhchhiatna’ a nih thu a sawi bawk a ni.

MSU chuan Notification an hal zawh hian H&TE Director hnenah lehkha thehlutin July 6, 2025 (Pathianni) ralhmaa an ngenna hi ngaih pawimawh anih loh chuan zirlai ten zirtirna tha an dawn theihnan Qualify ngei zirtirtu an duh thu Aizawl khawpuiah kawngzawh in tlangaupui an tum thu thu leh hmalak zel an tum thu an sawi bawk a ni.