Minister in sawrkar laipui a mi pawimawh te a dawr

Minister of State Lalnghinglova Hmar chuan nimin khan New Delhi-ah sawrkar mi pawimawh hrang hrang kawmin Mizoram mamawh hrang hrang thlenin thawhho theihna lai te a sawipui.

New Delhi-a cham mek Minister Lalnghinglova Hmar hian Narcotics Control Bureau-a Director General Anurag Garg chu kawmin Mizoram a ruihhlo hluar do turin thawhhona tha zawk neih a tul thu a thlen a. Myanmar ramri kaltlangin ruihhlo a lo lut nasa tih sawiin, intelligence-sharing leh thawktute training pek kawngah Mizoram Excise & Narcotics Department thuamchak an ngai tih a hrilh a. Excise Minister ngenna angin Mizoram leh North East State danga Narcotics kaihhnawiha thawkte tan capacity building training an buatsaih tur thu Director General hian lo hrilhin, Aizawl-ah NCB Zonal Office hawng tura ruahmanna a awm mek thu a lo hrilh bakah Myanmar atanga ruihhlo lo lut do kawngah tun aia inhnaih leh inpawh zawka thawhho dan tur an sawidun bawk a ni.

Sports & Youth Services Minister ni bawk Lalnghinglova Hmar hi nimin vek khan Ministry of Youth Affairs and Sports-a Secretary (Youth Affairs) Dr. Pallavi Jain Govil nen pawh an inkawm a, Department of Youth Affairs hnuaia thalai hma-sawnna kaihhnawih activity hrang hrang te Mizo-ram-ah nghah ve thin nise a duh thu leh Mizoram pawn atanga thalai tam zawk hip thei turin Aizawl-ah Youth Hostel sak a ngaih thu a thlen a. Youth Affairs Secretary chuan a theih anga hma an lak tur thu a sawi a ni.

Tourism Minister ni bawk Lalnghinglova Hmar hian Department of Public Enterprises (Ministry of Finance)-a Secretary Moses Chalai pawh kawmin Mizoram chu State tê, budget pawh lian lo tak a nih avangin hmasawnna hnathawh kawng ah Central PSE te kaltlanga puihna awm theite an sawidun a. Hemi hma niminpiah khan Ministry of Home Affairs-a Secretary (Border Management) Dr. Rajendra Kumar chu a kawm bawk.