Mizoram-a NH. 306 leh 06 chhe lutuk ah mipui hnatlang chet hmaa hma la turin sawrkar beisei

Mizoram kawngpui National Highway-306 leh 06 (Kolasib to Sairang) kawng zawh hleih theih loh khawpa chhia chungchangah pawl pali te chuan sawrkarin rang taka hma a la lo anih chuan mipuite hnatlanga an chhuah mai a ngaih tur thu sawiin, mipui hnatlang chet hmaa hmala thuai turin sawrkar an beisei tih an sawi.

Mizoram Transformation Movement (MTM), Centre For Environment and Social Justice (CESJ), Mizoram First (MF) leh Citizen Alliance For Truth And Justice (CATAJ) te chuan nimin khan Aizawl Press Club-ah thuthar thehdarhtute kawmin, Kolasib atanga Sairang inkar kawng chu zawh hleihtheih loh khawpa chhia anih avang leh motor tlu leh tang an awm thin thu sawiin, he kawng hi mipui chak lakna kawngpui pawimawh tak anih thu leh kawng chhia avanga mipui mamawh lakluh theih loha a awm chu pawi an tih thu an sawi a, heti taka kawng chhia a dahtute an dem tih sawiin, sawrkar chu a rang lama hma la turin an phut tih an sawi a ni.

Mizoram Transformation Movement President Dr. Lalbiakmawia Ngente chuan NH-06 Package 8, Kawnpui atanga Khamrang inkar kawng chu enkawl ala nih loh thu sawiin, kumin June ni 30-a PWD Minister in helai kawng enkawl hna chu Mizoram PWD mawphurhna a ni lo anga a sawi chu thudik lo a nih thu leh mipuite rilru hruaikawi nana he thu hi sawi ah an ngaih thu leh helai hmun hi Mizoram PWD enkawl lai ngei a nih thu a sawi bawk.

Heng Pawl pali hruaitute chuan he kawng pawimawh tak hi tu enkawlna hnuaiah pawh awm se, a ram neitu Mizoram Sawrkar mawh-phurhna a nih thu an sawi a, Mizoram Tripper Association mangang pawhin siam tura hma an lak ngam chuan sawrkar meuh chu mawhphurhna la a hmahruai tur leh kawng siamna tur boulder tlemte chauh thawhchhuah pui mai lovin hmanrua tha ber ber nena thawkchhuak nghal turin an beisei tih an sawi a. Sawrkarin rang taka hma a la lo a nih chuan mipuite hnatlanga chhuah a ngai mai dawn nia sawiin, hetiang ngai lo tur hian Sawrkar chu hna thawk nghal turin an beisei tih an sawi a ni.