Siaha District-a PMJKV hnuaia hmalakna tur Project pahnih lungphum phum a ni

PMJVK hnuaia Siaha District-a Project thlanchhuah pahnih (2) hna thawh tanna tur lungphum chu nimin khan Union Minister of State for Minority Affairs George Kurian chuan biakhmuhtheihna kaltlangin a phum.

PMJVK hnuaia nimin-a tungphum phum tak te hi PMJVK Scheme hnuaiah Mizoram sawrkar recommend-na a project thehluh atanga thlanchhuah niin ‘Construction of Public Market cum Multipurpose Centre and Women Facilitation Centre at Tipa V, Siaha District, Mizoram’ leh ‘Construction of Multipurpose Community Hall, Siaha District, Mizoram’ te a ni a. Hemi pual hian Siaha-a MADC Golden Jubilee Hall-ah hun hman niin Union Minister of State for Minority Affairs George Kurian chuan Prime Minister Narendra Modi kaihhruaina hnuaiah India ram chu kum 2047-ah Developed Country (Vikshik Bharat-2047) a siam tumna huang ah hmasawnna hna tam tak thawh a ni tawh tih a sawi a, Hmarchhak State leh a bikin Mizoram pawh nasa taka thuamchak niin ram hmasawnna turin theihtawp chhuah a nih thu a tarlang bawk.

Union Minister chuan Siaha District-ah PMJVK hnuaia thlanchhuah project pahnih lungphum phum a ni tur chu a lawmpui thu sawiin, Market Shed cum Multipurpose Centre and Women Facilitation Centre at Tipa leh Multipurpose Community Hall at Siaha te chu Mara ram mipuite nunphung nen pawh a inrem hle tiin tangkai taka hman a nih theih nan duhsakna sang ber a hlan a. Thu a sawi zawh hnu hian Video conference hmangin lungphum a phum zui nghal a ni.

Siaha Addl. DC Abraham Beirazi Khithie kaihhruai he hunah hian Siaha Bialtu MLA Dr. K. Beichhua chuan Siaha Bialtu a nihna angin Sawrkar laipui chungah lawmthu a sawi a, Sawrkar Laipui-a sawrkarna fawng vuan mekte chu hnam hnuaihnung zawk (Minority) te ngaipawimawh a, an dinchhuah ve theihna tura theihtawp an chhuah thinna ah lawmthu a sawi a, hun lo la kal zel turah pawh an hmakhua ngai chhunzawm a hmasawnna hmel an hmuh zel theihna turin thawhpuiah a sawm nghal bawk a ni.

He hunah hian Mara Autonomous District Council (MADC)-a Chief Executive Member (CEM) M. Laikaw pawhin Mara mipuite leh MADC aiawhin Central Sawrkar chungah lawmthu a sawi a, hnam hnuaihnung zawkte chawikanna kawnga an thahnemngaihna ah thinlung takin lawmthu a sawi a. Nimin-a Lungphum phum tak pahnih bakah MADC in PMJVK hnuaia project an thehluh dang pathum (3) tarlangin, a vaiin cheng nuai 9,000 man hu pawm a nih avangin lawmthu a sawi bawk a. Heng Project te hi Construction of Maraland Gospel Centenary Hospital; Construction of Girls Hostel at Zotlang, Aizawl leh Construction of school building within MADC area te a ni.