Kawng chhia vanga lirthei ding tam niin sawi

Mizoram Truck Owners' Association (MTOA) General Secretary Dina Tlau chuan kawng chhia avangin ‘lirthei tlan tir aiin din tir a hlawk zawk’ tia an lirthei din tir an tam tawh thu a sawi.

Nimin-a Akashvani in a kawmnaah he thu hi sawiin MTOA General Secretary Dina Tlau chuan Mizoram chak lakna kawngpui, Sairang leh Kawnpui inkar chu tha lai a awm meuh lo tih sawiin, Sairang pelh hret, Buichali nena inkar chu a chhiat zual thu a sawi a. Lei pawp leh rod lawr thlenga a awm thu leh heng hian an lirthei ke a tihchhiat nasat thu a sawi a. Kawng chhia avanga Traffic Jam a nasat thin thu leh zing-a Driver te chhuk thla chu nileng a tangin zanah an tlaivar thin thu leh a tuk tlai-ah an chhuah theih tawk thin thu a sawi a ni. 

Kawng chhia avangin mi tam takin lirthei din tir a hlawk zawk an tih thu leh tam takin an din tir thu sawiin MTOA General Secretary chuan, Kawng siam chu NHIDCL atangin a hminga mi tlem azawng an awm ve nia an hriat thu leh hna erawh a sawt loh thu a sawi a. Phai atanga bungraw lut tur pawh a luh hleihtheih loh thu a sawi a ni. 

MTOA General Secretary Dina Tlau chuan tunah chuan kawng siam hna thawktu NHIDCL an ngaihchan thu a sawi a, kartawp lamah a hmuna kal an tum thu sawiin, an kalchilh chuan kawng siam hna pawh a sawt deuha thina an hriat thu a sawi a ni.

Hetihlai hian thudawnna dang chuan Sairang leh Kawnpui inkar NH-306 kawngchhia avangin lirthei thahnem tak a tangkhang mek tih sawiin, nimin zing thleng khan lirthei tangkhang hi 500 chuang a awm niin a sawi bawk.