Journalists’ boral te ralna hun hman a ni

Nikum leh kumin-a Mizoram-a thuthar thehdarhna hna thawktu boral mi pathum chhungte hnenah nimin khan Mizoram sawrkar chuan ralna thilpek (Ex-gratia ) a hlan.

Hemi puala inkhawm nimin-a I&PR Conference Hall, Lianchhiari Run, Aizawl-a neih chu Information & Public Relation, Printing and Stationary Department changtu Minister Dr. Vanlalthlana chuan hmanpuiin lusun chhungte chu a tawrhpui tak zet thu a sawi a, sawrkar ang pawhin Chanchinbumite pawimawhna leh ram leh hnam tana an hlutnate chu an hre reng tih vawng tlat turin a chah bawk.

Nimin-a Chanchinbu mi boral ralna hunah hian nikum November 21-a boral Lalhmingmawia Pachuau (Pasaltha Daily Chanchinbu Editor, Champhai); nikum December 2-a boral Johan Lalhmunmawia (News Stringer, DDK, Lunglei); nikum December 23-a boral (T.C. Lalmuankima, Correspondent, RNU, AIR) leh kumin March 23-a boral H. Lalngaihawma (Hnehtu Daily Newspaper Editor, Aizawl) chhungte hnenah ralna sum hi hlan a ni a, Sawrkar chuan Accredited Journalist boralte chu Rs. 150,000 leh Non-Accredited Journalist boralte chu cheng Rs. 100,000/-in a ral thin a ni.

Nimin-a he hun hman hi IPR&PS Department Secretary Betsy Zothanpari Sailo chuan a kaihruai a. heng Journalist boral ta te sunna pualin minute khat chhung ngawi renga dinga hun hman niin, ralna thilpek hlanna neih nghal a ni a. MJA President C. Lalrambuatsaiha hnen atangin MJA member boral ta te chanchin tawi ngaihthlak a nih bakah Mitthi chhungte hnen atanga thusawi ngaihthlak a ni bawk.