Rel Station leh Rel kawng chungchang sawiho

Chief Minister Lalduhoma chuan nimin khan a Pisa-ah NF Railway (Construction)-a General Manager AK. Chaudhary leh a thawhpuite kawmin Sairang Rel Station hawn hun tur leh Mizoram chhim lama rel kawng kal zel tur chungchang a sawipui.

He inkawmna ah hian Sairang Rel Station hawng tur hian Chief Minister hian Prime Minister Narendra Modi a sawm thu leh Prime Minister hi a rawn kal theih dawn chuan inbuatsaih a ngai a. A hawnna function neihna hmun tur te, Hortoki leh Mual-khang Station a tlawhna atana Helicopter tumna tur lo siam lawk te, Rel kawng a endikna atana Special Coach lo buatsaih te a tul tur thu an sawi a. A rang lama inbuatsaih turin Chief Minister hian General Manager hi chahin, an hmalakna enhona thla thar ni 19 a neih leh nise an ti a ni.

Hei bakah hian Union Railways Minister-in a lo tiam tawh anga Sairang Rel Station chu ‘World Class’-a siam chhoh zui dan tur leh Rajdhani Express a rang lama tlantir nghal dan tur te pawh an sawiho bawk a. Chaudhary hian, tunah hian Rel kawng leh Station te hi chu hawn theiha peih a ni tawh a. Amaherawh chu Sairang-ah hian Secondary Maintenance Facility Centre for Coaches chu an sa leh mek tih sawiin, hei hian thla khat leh a chanve vel a awh dawn avangin an sak zawh hun hi Central lam chuan an rawn ngaichang leh mai thei tih Chief Minister hi a hrilh bawk.

He inkawmna ah hian Chief Minister hian Thenzawl chu Peace City atana siam tum a nih thu leh Master Plan siam hna an tan mai tawh tur a nih thu sawiin, chhim lama Rel kawng kal zel tur hian Thenzawl Peace City hi a daifem, hla vak lovah paltlang thei se, Station hi hla lutuk lo se a duh thu a hrilh a. An Preliminary Survey-ah chu chu lo ngaipawimawh turin a chah. NF Railway (Construction)-a General Manager hian Thenzawl kianga kaltir an tum dan report chu kumin October thla vela hriattir hman a tum tur thu Chief Minister hi a hrilh bawk a ni.