Serchhip District-ah thubuai ziahluh tlahniam

Nikum (2024) January atanga July thla chhungin Serchhip District-ah Police ten thubuai 101 an ziahluh laiin kumin-a hemi hun chhung hian thubuai 72 ziahluh a ni a, thubuai ziahluh hi nasa takin a tlahniam a ni.
Serchhip District Police te chuan nimin khan Serchhip SP Office Chamber-ah SP Gavit Gogna IPS hova Crime Review Meeting neiin kumin a Serchhip District chhunga Police ten thubuai an ziahluh dinhmun an thlirho a, he hunah hian Serchhip District chhunga Police Station pathum- Serchhip PS, Thenzawl PS leh North Vanalaiphai PS atangin OC leh 2nd OC te telin kumin chhunga an hmalakna hrang hrangte an tarlang a ni. He huna tarlan a nih danin kum kalta (2024)-ah khan January atanga July thla thlengin Serchhip District-a Police Station pathum-ah hian thubuai 101 ziahluh niin kumin hian January atanga nimin, July 18 thleng khan thubuai 72 ziahluh a ni thung a, nikum aiin kumin-a thubuai ziahluh hi 29 laiin a tlem zawk a. Kumin January atanga July thla thlenga thubuai ziahluh 72-ah hian mihring 76 man an ni a, heng thubuai zingah hian 24 te chu chinfel ni tawhin pawikhawihtu a puh te chu Court in thiamloh a chantir a ni.

He thutkhawm ah hian dan leh thupek (Law & Order) kenkawh kawnga hmalak zel dan tur bakah chak zawka Police te hnathawhna tur atana tul leh pawimawh hrang hrangte pawh an sawiho nghal bawk a ni.