DC in JNV School-ah zirlai a tam thei ang luhtir tha a ti

Serchhip District Bawrhsap Paul L. Khuma chuan Serchhip District in JNV School kan nei chu a vanneihthlak tih sawiin, naupang a tam thei ang ber luh kan tum a pawimawh thu a sawi.
Thenzawl-a Jawahar Navodaya Vidyalaya (JNV) School dinhmun leh hmasawn zel dan tur ngahtuahin nimin khan District Bawrhsap Paul L. Khuma hovin thuneitute chu Serchhip DC Meeting Hall-ah an thukhawm a, JNV School hian an School-in naupangte zirna tihmasawn tura tan an lak dan te, Zirlaibu piah lamah kawng tinrenga puitlinna kawng an zawh theihna tur leh thiamthil danga hma an sawnna tura naupangte an kaihhruai dan kawng hrang hrangte a lem nen entirin an hrilhfiah a ni.

JNV School hi Central School niin thingtlanga chhungkaw harsa zawk ten man tlawm te-a an fate zirna thaa an kal tir theihna tura sawrkar laipui hmalakna a ni a, nimin thutkhawm kaihruaitu Bawrhsap Paul L. Khuma chuan Ser-chhip District chhungah Thenzawl hmuna zirna In tha tak, JNV School kan nei chu kan vanneih zia hriaa naupang a tam thei ang ber luh kan tum a pawimawh thu a sawi a ni.

He thutkhawm ah hian hmalak dan tur hrang hrang sawiho a ni a, Enrollment-a hma an sawn zel theih nan JNV Selection test - pawl 6 atan bik Special JNVST chu July ni 26, 2025 hian neih tur a ni a. Thenzawl pawn lama awmte tan an kalna tur ngaihtuah sak an ni ang. Quotation chungchangah harsatna te sawiho a ni a, dan angin Advertisement chhuah thin ni mahse, quotation thehlut an awm loh thin avangin harsatna an tawk tih sawilan a ni a. School cheithatna tur leh bungraw chhia siamthatna tur rawtna te chu pawmin JNV a Daily Wage-a thawk tur mi 16 lak remtih a ni a. Electric Audit neih a tul thin avangin hmalak dan tur sawiho a ni a. Thenzawl-a AYUSH Hospital atangin naupangte hriselna endiktu tur Doctor an kal thin avangin lawmthu an sawi a, a tul anga chhunzawm zel turin an ngen nghal bawk a ni.