Serchhip District-ah raltlan 913 awm mekin Raltlante Biometric Enrolment tih dan tur rel a ni

Myanmar leh Bangladesh atanga raltlan rawn lutte tanaBiometric Enrolment of Displaced Persons through Foreigner's Identification Portal chungchang chu nimin khan Serchhip-ah sawiho a ni a. Tun dinhmunah Serchhip District-ah hian Myanmar atanga raltlan 647 leh Bangladesh atanga raltlan mi 266, an vaiin mi 913 an awm mek nia chhinchhiah a ni.

Nimin khan Serchhip-ah District Level Committee on Displaced Persons chu an Chairman leh Bawrhsap Paul L. Khuma hova thukhawmin India rampawn, Myanmar leh Bangladesh atanga raltlan rawn lutte ziahluh dan tur, Biometric Enrolment of Displaced Persons through Foreigner's Identification Portal chungchang sawiho a ni a, he hunah hian Nodal Officer for Biometric Enrollment of Displaced Persons Vanthangpuia SDC chuan he hmalakna chungchang kalkhawmte hmaah sawifiahin, Enrollment ti tura Central sawrkar in thupek a chhuah dan te, he Portal-a inziahluh dan ah Mizoram sawrkar in himlo a tih chin siam danglam tura a ngen anga Central sawrkarin a rawn siam danglam thu te a tarlang bawk a. Hei bakah hian District Level-a hmalak dan tur kalphung te ngaihthlak a nih hnuah ruahmanna hrang hrang siam a ni bawk.

Nimin-a thukhawm in ruahmanna an siam dan chuan District Level Team for Biometric Enrollment Member atan Nodal Officer leh SDC Vanthangpuia bakah SP Office atangin RK. Lalremruata bakah raltlan awmna khaw tin atanga VC leh YMA aiawhte ruat an ni a, DC Office leh SP Office atangte in a hmun-a Enrollment la tu tur, District User pathum (3) ve ve ruat an ni bawk a, khawl hman turte a thlen kim veleh raltlan awmna khaw tina Enrollment lak hun tur Schedule Plan siam a ni a, Enrollment tihna hmunhma chu an khawtlang hruaitute, VC leh YMA ten tha an tih angin an ruahman anga, YMA leh VC te hnena enrollment pawimawh zia leh raltlan inthawnletna tur a nihloh zia inhrilhhriat nawn leh a ni bawk ang.

Heng bakah hian Thenzawl leh North Vanlaiphai Sub-Divisions huamchhung khua te tan Thenzawl SDO Civil leh North Vanlaiphai SDO Civil te kaihhruainaa kalpui tura ruahman a ni bawk a, hemi rual hian District Level a registration mechanism kalpui tura ruahman a ni.

Chhinchhiahna atanga a lan danin tun dinhmunah Serchhip District-ah hian Myanmar atanga raltlan rawn lut khaw hrang hrang 30-ah mi 647 an la awm mek a, mipa 198 leh hmeichhia 150 bakah naupang 299 an ni a. Bangladesh atanga raltlan rawn lut pawh khaw pathum ah mi 266 awmin mipa 75, hmeichhia 73 leh naupang 118 an ni a, Relief Camp siam a awm lo a ni.